WARBIXIN:- WAXAY NAGU HAYEEN,AYAY ISKU HAYAAN.!!!

July 11, 2012

Ma ahan wax la wada dafiri karo in umad waliba oo meel ku wada nool ay u baahantay xeerar ay heshiis kuwada yihiin oo qoran isalmarkaana si cad u qeexi karaya wax kasta oo sababi kara in ay ka abuuraan dhexdooda muran siyaasadeed iyo mid bulshadeed labadaba, hadaba iminka waxaa horyaala Umadda Soomaaliyeed qabyo qoraaleedka Dastuurka oo la galiyay waqti iyo maal farabadan soona maray gacmo kala duwan 6 sanadood ee la rogrogayay.

Mudadaasi dheer dastuurka KMG ah waxaa faraha ku hayay gudi caalamiya oo magaciisa loo soo gaabiyay (IFCC) kaas oo isagu jira Soomaali iyo Ajaanib lagu sheegay in yihiin dad quburo ku ah hab diyaarinta dastuurka, dhanka kale dastuurkan waxaa tixraac looga sameeyay sida la sheegay dastuur kii 60 kii , kii dowladii kacaanka iyo qodobada qaar oo la sheegay in lagaga soo biiriyay dastuurada caalamka qaar kood.

Gaar ahaan wadamada aan wadaagno nidaam siyaasadeedka la doonayo in Soomaaliya lagu maamulo mustaqbalka dhow iyo kan fogba kuwaas oo ah dowladaha muslimka ah si la isku waafajiyo qoraalka dastuurka iyo isabadala bulsho iyo deegaan ee Soomaaliya waqtigan ka jira.

Tan kale waa hubanti in dad badani ay layaab ku noqotay cadadka lacageed ee beesha caalamku ay ku bixisay dastuurka qabyo qoraaleed ka ah oo ay iminka qolo waliba si uga qeylineyso walina aan lagu kala qanacsaneyn, Dastuurkan oo sida ku xusan asal looga dhigay diinta islaamka maadaama aanu nahay umad muslim ah 100%, hadana waxaa uu ka kooban yahay 77 qodob, ugu horeyna qodobadaasi qaar ka mid ah waxaa ay la kulmeen mucaarado xoogan oo dal iyo dibadba leh waxaana sidoo kale dhaliilo u jeediyay Culimada Soomaaliyeed oo sheegay in dastuurka qodobadiisa qaar ka mid ahi ay ku jiraan qodobo ka hor imaanaya diinta islaamka, inkastoo beesha caalamka ay handaado kala horyimaadeen dadkii ka cabanayay qodobo ku jira Dastuurka. .

Hadana waxaa cad in madaxda qaar ka mida dowlada KMG ah iyo beesha Caalamka ay handadaado ku sameeyeen dhinac yadii durayay qabyo qoraalka dastuurka kuwaas oo si isdaba joog ah mudooyin kan Muqdisho ugu qabanayay shirar lagu diidan yahay qodobada qaar ku qoran dastuurka, haatan in ay ka hadlaan iskaba daaye waxaa lagu amray hay'adaha Nabadsugida in ay kula xisaab tamaan Hoteeladii lagu qabto shirar looga hadlayo isbadala dalka iminka ka soconaya.

Inkastoo soo bandhigista dastuurku ay ku soo beegantay xilli aad u adag oo ay dalka ka jiraan qilaafyo siyaasadeed iyo dagaalo ay dowlada KMG ahi ku dooneyso in ay kula wareegto labada Shabeelle oo gacanta dowlada ka maqnaa intii lasoo doortayba, hadana lama dafiri karo in dowladan.   waxyaabaha ugu muhiimsan ee horyaala ay ka mid yihiin dib u xoreynta gobolada koonfureed ee dalka oo ay inbadan oo ka mid ah gacanta ku hayaan Al-shabab iyo turxaan bixintaqabyo qoraalka Dastuurka KMG ah,

Hadana  sida saxda ah waxaa Dastuur waliba uu dhaqan gal noqon karaa marka baarlamaanku ansixiyo aftina looga qaado shacabka islamrkaana uu Madaxweynuhu saxiixo, hase yeeshee Somaliya maadama aysan waqtigan suurtagal ka ahayn in qof kastaa oo qaan gaar ah oo miyir qaba laga qeybgaliyo dooda Dastuurka, .Waxaa taas badal keeda loo igmaday Odayaal Dhaqameedyo aasaas looga dhigay xiliga loogu magac daray (Kala-Guurka) wallow qudhooda wax laga sheeg sheegayo sida cidda soo casuumtay ama maamuleysa, hadana ma ahan howlyar in meel la isugu keeno odey dhaqameedyo tira intaa la'eg ka kooban lana sheegay in laga kala keenay Gobolada Dalka.,

Si kastaba ha ku yimaadaane  waxaa muuqata in odoyaal dhaqeedyadan la saaray masuuliyad ka weyn oo taariiqiya oo la oran karo waxaa ay la mid tahay tii Legadii oo kale, inkastoo waqtigu aanuu ahayn waqtigii oo kale hadana waxaa laga rabaa in ay masuuliyadooda u gutaan si Soomaalinimo ku dheeghan tahay kana muuqato Wadaniyad, iyo cadaalad, hadiise sida iminka xamxamtu ay sheegeyso ay yihiin odayaal dowladu KMG ah iyo wakiilka QM Ogestin-Mahiga ay meel kuwada xareysteen oo aan loo ogoleyn in ay dhageystaan talada Aqoonyahanada iyo tan bulshada rayidka ah kaga imaanaysa taasi waxaa ay u muuqaneysaa in ay yihiin odoyaal magac u yaal ah oo aan ka madaxbanaaneeyn amarada dowlada KMG ah..

Waa sax in mudooyinkii dambe ay is gaabiyeen dad badan oo ka hadli jiray dastuurka iyo xaalada siyaasadeed uu dalku iminka marayo iyo in ay yaraadeen shirarkii looga hadli jiray siyaasada dalka, hadana inkastoo xaalku sidaa yahay lama oran karo maamulayaashii dastuurka waxay ku adkeysteen sidii larabay.

Waayo, dhowaan waxaa la sheegay in odaayaal dhaqameedyada loo qeybiyay dastuur la sheegay in wax laga soo badalay qodobadii qaar ee la diidanaa, tan ugu daranise waxay ahayd markii ay gudiga dastuurku ku tilmaameen xadgudub iyo faragalin markii dowlada KMG ahi ay qoraalka dastuurka u qeybisay odaayaal dhaqameed yada islamarakaana ay sheegeen in loo gacan dhaafay howshoodii, sidoo kale odayaal dhaqameed yada ayaa iyaguna sheegay in aaney u madaxbanaaneyn dastuurka loo qeybiyay in ay turxaan bixiyaan oo aaney u madaxbanaaneyn amaba ay ka dhiib taan fikir kooda.

Madaxda dowlada KMG ah oo iyana dhowaan ka hadashay go’aanka ay sida wadajirka ah u soo wada saareen gudiga dastuurka iyo odoyaal dhaqamaadku ayaa waxaa ay sheegtay in gudigu uusan xaq u lahayn in uu qaado talaabo ceynkaasi oo kala ah maadamaama uu waqtigiisu dhamaaday.

Su aasha hadaba la isweydiinkaro ayaa waxaa ay tahay sharci ahaan xil maka qaadi kartaa dowladu gudiga dastuurku ? taasi waxaan u deynayaa sharci yaqaanada iyo aqoonyahanada Soomaaliyeed, dhanka kale hadii shalay Culimaa’udiinka, Aqoonyahanada iyo Beelihii ka hadli jiray qabya qoraalka dastuurka lagu tilmaamay in ay yihiin qaswadayaal,

Hadda maxaa loogu yeeri doonaa gudiga dastuurka Soomaaliya maadaama ay cadeeyeen sida loo wado dastuurka, oo dowlada KMG ay faragalin ku hasyo, taladoodana aysan u madaxbanaaneyn, markase aad fiiriso sida ay wax u socdaan waa mid ku soo xasuusineysa sheekadii ahayd.:-

“Waxaa weel wax kuwada cuni jiray wiil iyo gabar wada dhashay, gabadhu wiilka wey ka boobi jiray cunada, markuu in mudda ah wiilku qarsanayay dhib kiisa ayuu maalin maalmaha ka mid waxaa uu Aabihii ka codsaday in maanta oo qudha gooni loo siiyo cuntadiisa.waana laga aqbalay.

Wiilkii oo faraxsan ayaa intuu isha ku xaday gabadhii oo meel halkaas ah cuntada labada gacmood ku cuneyso, markaas ayuu inta qoslay oo Aabihii soo jeediyay ku yiri Aabo eeg gabadhaadi waxay igu heysay ayey isku heysaa, halkaas ayuuna Abihii ka ogaaday in gabadhu dhib weyn ku heysay Wiilka,".

Hadda sow dadkii horay uga hadli jiray dastuurka ee la caburiyay xaq uma lahan in ay yiraahdaan, maadaama diyaariyaashi dastuurka iyo madaxdii dowlada KMG oo awalba is ku meel ahaa ay maanta is hayaan in ay qoladii hore tiraahdo WAXAY NAGU HAYEEN AYAY ISKU HAYAAN.!!

DHAMAAD/=

FG TANI WAA ARAGTIDEYDA.

Qalinkii C/qaadir Max’ed Faarax Dulyar