WARBIXIN:-SAXAAFADDA MUQDISHO IYO BOOLISKA FIKIRKA,MAXAA KALA HEYSTA.!!

10.08.2009.

Marka la soo hadal qaado saxaafadda muqdisho, waa hubanti in ay wax badan maskaxdaada ku soo dhacayaan, waxa uuse aqristuhu su’aal iska weydiin karaa macnaha Booliska fikirka loola jeedo, dabcan isbadalada waqtiga iyo waayuhu, waxa ay subax walba keenaan arimo cusub, arimahaasina waxa ay u baahan yihiin in loo helo hal-kudhig cusub.

Tan iyo markii ay muqdisho ka hanaqaaday Saxaafadda Xorta ah, oo ku beegneyd bur-burkii dalka, iyo dagaaladii sokeeye, waxa ay saxaafadu aheyd mid iyana ku dhex milneyd isbadalada dhacayay, Idaacado iyo T.V-yo dhowr ah ayaa udbahooda laga taagay muqdisho, waxaa ka howl bilaabay saxafiyiin kala heer ah oo isugu jira, Xirfadlayaal hore iyo dhalinyaro cusub, oo aan fursado u helin tababaro saxaafadeed, koox walabina waxa ay ku shaqeyneysaa aragtida Mulkiilaha oo ay suurtagal tahay in aanuu aheyn xirfadle hagi kara howsha uu horkacayo, balse muhiimadiisu tahay in uu ka dhex abuuro dhaqaale,,inkastoo ay jiraan Saxafiyiin rug cadaa ah oo aan raali ka aheyn sida goobta uu joogo shaqadeedu ku socoto, balse la oran karo waqtiga ayaa ku qasbay, qaarkoodna markii danbe.sidaa shaqada uga tagay,

Saxaafadda muqdisho, runtii waa midd la oran karo, waxa ay huwan tahay xumaan iyo samaan, marka la fiiriyo helitaanka wararka, barnaamijyada taleefoonada lagu qabto oo fursad u siisay dadku in ay aragtidooda dhiibtaan, Qodobadda doodaha, iyo guud ahaan barnaamijyada adeega bulshada ah, waxaa la oran karaa waa horumar, markase dhinaca kale laga eego, hadii aan howshaa baaxadda leh loo habeyn si taxadar leh oo xirfadyahanimo ah,,isla markaana uu xaalku noqdo yaan warka lagaala hormarin iyo waxaad rabto sheeg, sida hada lagu shaqeeyo, waxa abuurmaya dhibaato ka baaxad weyn xabadaha dhacaya.

Saxaafaddu, waxa ay waayadaan danbe noqotay, meesha laga soo galo Siyaasadda Soomaaliya, meesha laga barto ruuxa doonaya in uu wax mucaarado ama taageero, meesha laga iclaamiyo dagaalada, meesha la isaga hanjabo, meel lacag ama {sharuur} hadaad siiso lagaaga baahinayo waxaad rabto. ilaa markii danbe Saxaafadii ay muuqatay mid si cad ula kala safan dhinacyada isku haya Siyaasadda Dalka, si kastaba ha ku timaadee, arimahaasi iyo kuwa kaloo aan ka tagayna,waxa ay sababeen in Suxifiga iyo Saxaafadda ay ku yimaadaan qodobo dhowr ah, qaar waa kuwa lagu xanto, qaarna waa kuwa ka hor istaaga howshooda ama Qatar galiya naftooda,

Kuwa lagu xanto waxaa ka mid ah:- 1:- Sharaf dhac, 2:- Kalsooni daro, 3:- In ay saxaafadu sii huriso Dagaalada iyo khilaafaadka, 4:- In bulshadu nacdo saxaafadda ,5:- In saxaafadu ay qeyb ka tahay mushkiladaha ka jira dalka, kuwooda ugu waaweyn una baahan tahay in iyaga xal loo helo,iyo in ugu danbeyntii dhageystaha ama daawadaha doonaya in uu helo xogta xudunta soomaaliya uu noqdo ruux u bareera in uu raaco diyaarad uu ogyahay in aanuu aqoon fiican lahayn Beyloodka kicinaya,waadna dareemi kartaa in aanuu ruuxna ku qanacsaneyn raacista hadii loo sheego ama uu ogyahay diyaarad aanuu wadin duuliye aqoon lihi, ,halka kuwa qatartu uga tiamadana aan ka soo qaadanayo, 1:- In koox kasta hadeey ka weyso sidii ay horey uga baratay, ay colaadiso ama ugaarsato, sida hadaba dhacday oo qudhooda Qatari uga timaado Garab Siyaasadeed ay iyagu shalay si qaldan u buun-buuninayeen,dadkana bareen

Anigoo aan dooneyn in aan ku sii dheeraado dhaliilaha Suxifiga iyo Saxaafadda Soomaaliya,maadaama aan lagu soo koobi Karin maqaal kaliya,hadaan u soo noqdo dulucda sheekadeyda,marka aad aqriso ama aad maqasho erayga Boolis, durba waxaa kugu soo dhacaya ciidan amaanka sugaya, ruuxii danbi galena xabsiga u taxaabaya, balse qisadan suxufiga iyo fikirka booliska maxaa kala heysta, waa ay ka duwan tahay sidaa,

Sida looga bartay saxaafadda muqdisho waxa ay waayadaan danbe aheyd aalad ay Siyaasiyiinta, Aqoonyanada, Ganacsata, Culumaa’diinka, iyo dadka caadiga ahba ku fadhi ku diriraan , kana dhiibtaan argtiyahooda ku aadan hadba wacyiga siyaasadeed ee markaa lagu jiro, si taa la mid ah wariyayaasha ayaa ku falan-qeyn jiray barnaamijyo gaara ah, waxa markaa dalka ka dhacaya, qof walbaana waxa uu si xor ah oo aan baqdin laheyn u soo bandhigi jiray waxa uu ka aaminsan yahay,

Arinkaa hada waa is badalay, oo waayoo, waxaa dad badan loo dilay markii ay warbaahinta ka dhiibteen fikirkooda, waxaa wariyayaal badan loo dilay ama loogu hanjabay cabiraada fikirkooda, waxaa Saxaafadda lagu qasbay in ay baahiyaan halku dhigyo kooxo gaar ihi la baxeen qaarkoodna waxaa lagu qasbay in dhinac ka mid ah dhinacyada is haya aaneey wararkooda buun-buunin, oo ay dhex dhexaadnimadii Journalisamka ka fogaadaan,

Waxaa dhacday in hadii aad Fox –Pop, ama makaroofanka la dhex qaado dadweynaha, oo markaa ruux kaa ogolaado in uu ka hadlo mowduuca aad u soo bandhigtay,marka uu hadalka bilaabo hadii uu ruux kale meesha soo istaago in uu aamuso, dabadeedna uu ku yiraah , {adeer waan ka baxay,kama hadli karo} waayoo waxa uu ka baqayaa in loo waxyeeleeyo fikirka uu ka dhiibanayo muwduuca aad xanbaarsan tahay,si taa la mid ah hadii aad Aqoonyahanada Culumada, Cuqaahsa ama dadka caadiga ahba aad ka codsato in ay kaala qeyb qaataan Barnaamij lagu falan qeynayo xaaladda dalka,mid walba waxa uu si hoose kuugu sheegayaa in aan xiligan laga hadli Karin arimahaa,halka markii hore ay ku soo kala hor mari jireen in ay fikirkooda ka dhiibtaan marxaladda siyaasadeed ee lagu jiro ama dagaalada ka socda Dalka.

Marka la waayay qof fikirkiisa dibada u soo saara, afkana gariir la wada saartay, waxaa meesha ka baxay barnaamijyo door ah oo sixid, dhaliil, iyo amaanba loogu soo jeedin jiray, waxa markaa dalka ka socda iyo cida horkaceysaba,Suxifigiina waxa uu noqday mid codkiisa la baqa, xataa dadka barakacayaasha ah oo awal cod dheer ku baahin jiray cida dhibaatada ku heysa ayaa haatan su’aalahaasi in ay ka jawaabaan fartana ku fiiqan oo ka gaabsaday, sow marka lama oran karo waxaa yimi Boliska Fikirka……..

FG:-TANI WAA ARAGTIDEYDA.

C/qaadir Max’ed Faarax {dulyar}

Dulyar21@hotmail.com

Neyropi, Kenya.