WARBIXIN:- MUDANAYAAL , LABADA OROD MID DAAYA.!!!

Nov 8, 2014

Waa dhacdo goob joog loo soo wada ahaa sanado badan oo ina soo maray, sidaa daraadeed Shacab ku xiiso uma qabaan lamana yaabana xiligaan sida wax u socdaan waayoo wey soo arki jireen weyna ka dharagesan yihiin ujeedka iyo halka loo socdo ama ay ku danbeyn doonto sheekadu, balse waxa kaliya ee ay is weysiinayaan waa:- Maxaa Madax deena isku dabeecad ka wada dhigay,? Miyaa marka hore la isku soo qasbaa wada shaqeyntooda.? Xagee laga soo magacaabaa Raysal-Wasaaraha.? Iyo Madaxdeenu la dirir mooyee la shaqee miyaaneey aqoon.? Dabcan Weli jawaabo la taaban karo looma hayo weydiimahaasi.

Tan kale Malaha hadii Madaxdeena dhiigooda la wada baadhi lahaa waxaa suurtagal noqon lahayd in ay isku nooc wada noqon lahaayen balse nasiib daro lama baarin, mid walibana waxa uu noola yimaadaa ama nooga tagaa calaamado u eg raadadka kii ka horeeyay, welina waa ay socotaa dabeecadda ah MA WADA SHAQEYN KARNO.!!

Waxaase doorkan Cajiib ah in ay bulshadu ka gudubtay ka hadalka waxa ay Madaxdu isku khilaaftay ayna taa badalkeeda baararka iyo Maqaaxiyaha shaaha lagu cabo ku xisaabinayaan marka Madaxweynuhu soo xulanayo Reysal wasaare la shaqeeya iyo sanad ka dib marka ay is qabtaan ama marka Reysal wasaaraha loo qabto Xaflad diisa Magacaabista, iyo marka uu sanad jirsado ee la is qaniino, dhaqaalaha ay ku kala bixiyaan Madaxdu labadaa marxaladood ee kala dareenka duwan kalana dadaalka badan, , iyo weliba waqtiga qaaliga ah ee ay ku lumiyaan, inkastoo qiyaas ahaan ay aad u kala sareeyaan hadana waxaa la isku raacsan yahay in tan danbe lagu lumiyo dhaqaale aad u fara badan oo aan markii hore laga fikirin baajintiisa.

Hadiise waqtiyadii hore marka la maqlo khilaafka ka dhex jira Madaxda Sare ee dalka durbadiiba loo kala fasiran jiray siyaabo kala duwan taasi hada meesha waa ay ka baxday ka dib markii uu Xildhibaan xog ogaal ah oo ka mid ahaa aqoon yahanadii wax ka soo diyaariyay Dastuurka KMG ah, uu dhawaan si cad u sheegay in markii horeba diyaarinta Dastuurka loogu talagalay in ay is qabtaan Madaxda Sare ee dalku waayoo ayuu yiri waxaa laga cabsaday in ay yimaadaan Madax is fahamsan oo boobta hantida iyo awoodda dalka xiliga KMG ah.sheekadaana wey socon doontaa Inta laga gaarayo Doorasho xor ah oo dalka ka dhacda oo lagu soo doorto Madaxda Dalka. Runtii markii aan maqlay hadalkaa qudheyda wax badan oo ku aadan khilaafka Madaxda Sare ayaa iska key badalay .

Haa, waan garowsaday hadal kaa waayoo waxaan xasuustay in hadaba iyagoo Madaxdeenu aaney aqoon badan isku laheyn lagana yaabo in ay kala baqayaan in hadana markasta la sheeg sheego in la musuq maasuqo deeqaha iyo dhaqaalaha Caalamku noogu yabooho, maxaad u maleyn laheyd marka hadii koox istaqaana ama is fahamsani ay gacanta ku dhigi laheyd talada dalka xiliyadan KMG ah,waxaa hubanti ah in ay na soo gaari lahayd jug ka culus midda hada na gaartay.Dhanka kalese waa fariin ayaan dara ah oo muujinaysa in waqtigii ku haboona Madaxda Soomaaliyed lagu aamini waayay samata bixinta dadkooda iyo dalkooda burburay.

Inkastoo hada la hadalhayo in uu khilaaf ku faraha la galay qorshaha loo sameeyay in lagu gaaro Siyaasada 2016-ka taasoo labada oday ay isku fahmi waayeen maadaama aaneey isku meel u wada socon, hadana Siyaasad ahaan waxa ay Madaxweynaha ku noqon doontaa wajigabax iyo in uu laba Sano gudahood la shaqeyn waayay labo Raysal Wasaare, waxaaba suurtagal ah in ay beesha Caalamku gabi ahaanba ka aamin baxaan Madaxda Soomaaliyeed gaar ahaan kuwa iminka talada dalka haya,sidaas oo ay tahayna waxaa la leeyahay hadana waa uu ku qasban yahay in uu is dhaafiyo Raysal Wasaaraha iyada oo sida muuqata loo mari doono codka Baarlamaanka, si ay isaga iyo saaxiibo dii sameyn weyn ugu yeeshaan talada dalka wixii ka dambeeyay 2016-ka, waxanse la dafiri Karin in uu halkaa ku lumi doono waqti badan oo la qaban lahaa howlo muhiim u ah dalka iyo dad kaba.

Ugu dambayntii, iyadoo doorkan laga faa’ideysanayo waaya aragnimadii la soo maray miyaney ku habooneyn in ay Madax deenu labada orod mid daayaan, sida orodka iyo xiisaha ay marka hore isugu soo xushaan xilalka sar sare ee dalka oo marka farxadooda la arko lagu wada maqsuudo in ay si dhow oo hufan u wada shaqeeyn doonaan iyo orodka danbe oo ah in Sanad ka dib la maqlo gafuur tuur iyo xanaaq xarga gowys ah oo dhex yaala Xaafiis yada Madaxda Sare, Waayoo Ma aha labo is qabata ama la jeclaan karo in sanad walba la caadaysto muran Madaxeed joogta ah oo ka bilowdo dano gaar ahaneed kuna dhamaada codka Baarlamaanka iyo cadaadis shisheeye.