TALO SOO JEEDIN KU SOCOTA MADAXDA DALKA:.!!!

ASTAANTAADA XURMEE !!!!

Alaha u wada naxariistee waxaa sanadkan waqtiyo is xig xiga geeriyooday dad bulshada Soomaaliyeed magac iyo maamuus ku lahaa Sida resalwasaarihii hore Marxuum C/risaaq X. Xuseen oo ku geeriyooday Dalka Mareykanka,hase yeeshee geeridiisu noqotay mid dowlad iyo shacaba si isku mid ah u taabatay,

Dhanka kalena, iyadoo la dhowrayo dardaarankii Marxuumka, loona muujinayo heerka uu ka taagnaa bulshada Soomaaliyeed ayaa waxaa Aas wadajir ah oo si weyn loo agaasimay oo ay ka qeybgaleen Madaxda Dowlada dhexe,kuwa Maamul goboleedyada,Siyaasiyiin.Aqoonyahano,iyo dadweyne aad u tira badan loogu sameeyay Magaalada Muqdisho,waxaana leeyahay Allaha u naxariisto Marxuumka.

Sidoo kale waxaa dalka Jarmalka ku geeriyooday Maexuum Maxamed Saleeban Tubeec,oo ahaa fanaan Soomaaliyeed oo in badan ku soo jiray fanka kuna muteystay magac iyo maamuus,taana waxaa daliil u ah in aan marnaba muran lagalin noloshiisa iyo geeridiisa ka diba in uu yahay boqorka codka oo ah darajo uu ku muteysatay luuqdiisa iyo sida uu fanka hormuudka ugu ahaa.

Marxuum M.S.Tubeec Alaha u naxariistee qudhiisu waxa uu ka dardaarmay intii uu noolaa in lagu aaso Barbara oo ay waalidiintii ku aasnaayeen ama magaalada Muqdisho oo ah halkii uu ku koriyay fankiisa kuna muteystay magaca uu uu la god galay ee Boqorka codka,ayaa Alle u qadaray in Dowlad iyo shacaba iyadoo aan loo kala harin in Muqdisho loogu sameeyo aas aas wadajir ah oo taariikhiya,oo dareensiiyay dhamaan fanaaniintii la heerka aheyd ee nolosha lagu dayacay in ay leeyihiin dad aasa iyo dal lagu aaso,Waxaana leeyahay Allaha u naraxariisto Marxuumka,

Waxaa sidoo kale weerkii Madaxtooyada lagu qaaday maalintii Jimcaha oo ay taariikhdu aheyd 21.02.2014, ku geeriyooday dad dhowra oo ay ka mid ahaayeen Ex Jan Nuur Shirboow oo ka mid ahaa Saraakiisha dalka xilal kala duwana ka soo qabtay mudadii uu shaqeynayay,nasiib daro Jan Shirboow ma aanuu helin maamuuskii uu mudnaa oo waxaa loo aasay si hoose iyadoo aaney jirin masuuliyiin dowlada ah oo ka qeyb gashay Aaska marxuumka,Allaha u naxariistee,

Hase yeeshee dhacdadaasi waxaa sidoo kale ku geeriyooday Xoghayihii joogtada ee Xaafiiska Resal wasaaraha, Marxuum Maxamud Xirsi {Indha-case} ……, oo ay isku goob ku geriyoodeen Janaraalka, Waxaa xusid mudan in aaska Marxuumka ay ka qeybgaleen Reysalwasaare C/wali sheikh,Reysalwasaarihii hore Dr Saacid, Xildhibaano iyo masuuliyiin kale oo ka tirsan Xukuumadda,

Wey fiicnaan laheyd in Jan Nuur Shirboowna si la mid ah sida loo agaasimay aaska Xoghayihii hore ee X/Reysalwasaaraha loo maamuuso ama si ka heer sareysa maadaama uu ahaa nin ka gaaray Ciidamada darajada Janaraal oo ah darajo aad u sareysa,waxaase laga yaabaa in Madaxda dowladu iyaga oo doonaya in aaney muujin qasaaraha ka soo gaaray weerarkaa in ay ogolaadeen in si shanqar la’aan ah loo aaso Marxuum Ex Janaraal Nuur shirboow,Alaha u naxariistee isaga iyo intii kale ee ku geeriyootay weerarkaase.

Sidoo kale Alaha u naxariistee Marxuum Shariif salax Maxamed Cali, ayaa maanta ku geeriyooday M/Muqdisho,marxuumku waxa uu ahaa Gudoomiyihii Gudiga qorista farta Soomaaliga 1972 -dii sidoo kale waxa uu dawladii kacaanka soo noqday Wasiirkii tacliinta sare,marna waxa uu ahaa Gudoomiyahii jaamacadda Umadda,sidoo kale waxa uu xili ahaa diblomaasi ka shaqeynayay safaaradihii Soomaalida ee wadamada China, Uk, Italy iyo Masar, Sidoo kale waxa uu ahaa Qoraa qoray dhowr buug iyo weliba shaqsi ururiya dhaqanka iyo suugaanta Soomaalida,waxaa bilo ka hor qaliin dhanka wadnaha ah loogu soo sameeyay Dalka Turkiga,sida ay sheegeen eheladiisuna waxa uu shalay u geeriyooday dhiig uga furmay madaxa.

Marxuun Shariif Saalax,waxaa isla maanta oo Jimca aheyd lagu aasay deegaanka Calamada ee duleedka Muqdisho,geeridu waa xaq oo qof waliba maalintiisa ayuu dhadhaminayaa,laakiin dad badani waxa ay is weydiinayaan maxaa loo waayay masuul ka socda dhanka Dowlada oo ka qeyb qaadanaya aaska Shariif Saalax oo ka mid ahaa hormuudka iyo astaanta Umadda,maadaama uu ka mid ahaa dadka fara ku tiriska ah ee waqtigooda u soo huray sidii ay soomaalidu u yeelan laheyd far ama qoraal afkooda hooyo ku qoran.

Waan hubaa Qoraa Xuseen Sh.Axmed [kadare] oo ka mid ahaa gudigaa in isaga iyo inta maanta ifka kaga danbeeysa Marxuum Shaeiif Saalax, aaney jecleysaneyn sida loo iloobay geerida Marxuum Shariif Saalah oo ay aheyd in ay madaxda dowladu ka qeyb qaataan Aaskiisa kana sheekeeyaan wax qabadkiisa, waxaase suurtagal ah in aaney madaxda maanta aqoonba u laheyn wax qabadkii Marxuum Shariif Saalax.Alaha u naxariistee.

Ugu Dnabeyntii anigoo ugu hambalyeynaya dadaalkii iyo waqtigii ay galiyeen Madaxda dowladu sidii ay u gudan lahaayeen wajibaadkooda ku aadanaa ka qeyb qaadashada Aaska shaqsiyaadka nagu weynaa ee geeriyooday, kuna dhaliilaya kuwa kale ee la iloobay, ayaan talo ahaan waxaan ugu soo jeedinayaa, in ay Madaxda Qaranku marka hore si fiican ula socdaan ka war qabka nolol iyo geeriba Shaqsiyaadka astaanta u ah dadka iyo dalkaba, sidoo kalena in ay had iyo goor maskaxda ku hayaan maalmaha Taariikhiga ah.ee lama taabtaanka ah.

=DH A M A A D/=

FG.TANI WAA ARAGTIDEYDA.

A/kadir Dular

Muqdisho//-