WARBIXIN:HUBKAAGAA HORUMAR KUU DIIDAN.!! WQ/-Dulyar

Marar badan ayaan maqalnaa deegaan hebel abaar baa ka dhacday ee haloo gurmado, ama deegaan hebel fatahaad sababtay khasaare nafeed,mid maaliyadeed iyo barakac xoogan ayaa ka dhacdaye gurmad degdeg ah halala gaaro. Ogow deegaan walba oo Soomaaliyeed iyo deeganadaas laleeyahay haloo gurmado ama ay dadkoodu abaaraha iyo fatahaadaha joogtada ah sanad walba ku dhimanayaan kuna hanti beelayaan, waxaa lagu dhex heystaa 70-meeyo gaadiidka dagaalka ah oo ay saaran yihiin qoryaha waaweyn ee dagaalka sida, Dhashiikayaal, Seka-Uu Zuu-37, Shilke, Ganta-Sey, Biiteyn,kumanaan dabajeexyo & Ake47 ah, iyo saanado kaloo badan oo rasaas ah oo aan hub dowladeed aheyn,oo haddii la qiimeeyo malaayiin dollar ah toban jeerna dabooli karta in wax looga qabto abaaraha iyo fatahaadaha ka jira deegaanada laleeyahay haloo gurmado. Waase haddii ay maalin qudha dadka deegaanku inta caqliga ka shaqeysiiyaan ay go’aansadaan in inta ay ka helayaan dowlad damaanad qaadi karta amnigooda, iney deegaankooda ka dhigaan deegaano hubka tirada badan ka caagan, inyaroo amniga lagu sugayo mooyee, kadibna ay wada iibiyaan hubka faraha badan ee ay heystaan, halkaasna dhaqaalaha ka soo baxa ay ku maalgashadaan deegaanadooda, sida wax soo saarka beeraha, dugsiyo waxbarasho,Cisbitaallo caafimaad, wadooyinka, iyo guud ahaan dhismaha kaabayaasha dhaqaale ee deegaanka, xaqiiqdii mardambe lama maqleen iyadoo deegaanadooda loo dawarsanayo, waxeyna tiigsan lahaayeen horumar & nabad. Marka aan sidaas leeyahay, Maryooleey waan ogahay inaan ka hadlayo wax aan loo bisleyn xiligaan, waan ogahay hubka qudhiisa in duruufo loo heysto, waana ogahay in sheydaan marhore isku keen diray oo uu nagu qufulay facaa iska dhici, gebigeenuna aan wada nahay keeb la yuurar, reer hebelna aan waardiye uga jirno, xitaa kuwa aan hadda leeyahay may hubkooda iibsadaan oo ku hormaraan, ayaa dhexdooda difaac isaga jira, ama aaminsan inaan hub la’aan la noolaan karin. Balse caqliyadda saxda ah waxey leedahay, waa in lagu dhiirado wax aan dhiiran jiran haddii ay maslaxo caam ahi ku jirto, waana in deegaan walba hubka maanta dhexyaalla oo aan ogahay iney dhexdooda dhib weyn ku qabaan, ay u fahmaan iney kaga maarmi karaan in sanad walba loo dawarsado, ama ay ku noolaadaan nolol aan mustaqbal laheyn, iyagoo awooda dhaqaalaha kaga jira hubka iney ku horumarsadaan noloshooda iyo tan deegaankooda, kuna heli kara nabad iyo iney u noolaadaan sida bini’aadamka, maadaama uu hubkoodu yahay midka horumarka u diidan.!! FG:-Fekraddan hadda hal deegaan oo yar bey ka hirgashay kuna caana maala,balse waan hubaa haddii uu deegaan kale oo macruuf ah ku xigsado, iney deegaano badan ka hirgeli laheyd, taasoo furre u noqon karta nabad guud oo Soomaaliya ka tisqaadda.!!! Maxaa Yaab Isdabayaal WQ: Abdulkadir Dulyar

WARBIXIN:HUBKAAGAA HORUMAR KUU DIIDAN.!! WQ/-Dulyar

Abdulkadir dulyar Sunday, December 22, 2024

WARBIXIN: MAXAA LOO WADA AAMUSAY.!! WQ/-Dulyar

Dad badan baa maalmahaan ku jehawareeray erayadaan jaceylka ah ee aan daldalayo, qaar baa run u mooda, qaar baa ila yaaban, qaar baa su’aalo iga soo weydiiya, qaarna waa ila fahamsan yihiin shacda & sababta aan fararaqdaas u soo qorayo, waayoo horey ayey iila socdeen, Dabcan, markasta oo ay xaraaradda Siyaasadda iyo ka hadalka waxyaabaha dalka ka socda ay fikta sare gaaraan, waa u mihiim qofkii aan mujaamalada iyo munaafaqadda aqoon inuu duufaanta socota ka gambado, hadeey ahaan laheyd toosin, tusaale iyo tilmaamidba. Sababtuna waxey tahay, waa koox uu Nin Sxbkeey ah u bixiyay “BOOLISKA FEKERKA” oo Wajibook dhex fadhida, kooxdani waxba sooma kordhiyaan, mana laha aragti fog oo ay wax ku cabiraan, keliya waxey ku foogan yihiin iney mucaaradaan ama taageeraan madaxda dalka, iyaga waxba kama gelin mustaqbalka iyo saameynta ka dhalan doonta ficilada & tilaabooyinka ay qaadayaan madaxda dowladda iyo kuwa mucaaradku, Sidoo kale, kooxdani waxey ugaarsataa fekradaha dadka indheer garadka ah ee dalka u turaya ay soo bandhigaan, waxaadna arkeysaa iyagoo durba dhanka xun ula boodaya, ama ku eegaya indho danabeysan, taasoo ku xambaartay in dadkii waxgalka ahaa ay intooda badan ka gaabsadaan ka hadalka arimaha ka socda dalka, lagana yaabee iney talooyin waxtar leh ku biirin lahaayeen marxaladda uu dalkeenu marayo.. •Dalka maanta kama jirto Saxaafad madax banaan, oo iyadoo ka faa’ideysaneysa awooddeeda soo bandhigi karta xaqiiqada dhacdooyinka dalka ka socda, ama kala shaandheyn karta doodaha ka soo kala burqanaya hey’adaha dowladda & dhanka mucaaradka, waayoo qaarkood waxey ku milmeen Siyaasadda, qaarkoodna waxey noqdeen la kireystayaal, halka qaarka soo harayna ay noqdeen kuwa war sidayaal ah, oo sidooda u soo gudbiya fariimaha ay dowladda iyo mucaardku la wadaagaan marka ay u yeertaan. •Sidoo kale,dalka maanta kama jiraan Ururo bulasho rayid ah oo macno leh, oo dheelitir u noqon kara Siyaasadda dalka, iyo aqoonyahano u damqanaya dalkooda oo isku xilqaamaya iney dadkooda u iftiimiyaan halka geediga loo yahay, sidii ay sameyn jireen Ururada bulshada rayidka ah & aqoonyahanadu waqtiyadii hogaamiye kooxeedyada iyo xitaa xiliyadii dowladihii KMG ahaa. Halkaas markeey taagan tahay, Platform-ka keliya ee hadda noo soo haray wuxuu noqday Social Media, isagana dadkii bulshada wax ku soo kordhin lahaa ama si cilmiyeysan uga hadli lahaa hadba marxaladda uu dalkeenu marayo, waxey uga kala carareen “BOOLISKA FEKERKA,” oo ah koox indhow garad ah oo sanduuq gaar ah kula xiran waxyaabo aaney dani ugu jirin waana sababta keentay in dadkii waxgalka ahaa ay fekradahooda la aamusaan, kuwana ay ula cararaan dhanka Twitter ama X-ta iyo meelo kale. Ugu dambeyn, waad ila fahamteen baan filayaa sababta dadka qaar ku kalifaysa iney afka xirtaan, qaarna ay uga hadlaan Sports ka, jaceylka, & sheekooyinka madadaalada ah oo keliya, kuwa kalena ay u noqdeen kooxo si indho la’aan ah ula kala safan Dowladda & mucaaradka qalad iyo sax wixii ay sameeyaana ku taageera, dabcan caqliyadda noocaan ah waxaa laga gudbi karaa oo keliya, marka ay shacabku ogaadaan iney dowladnimadu iyaga tahay, madaxduna ay yihiin adeegayaal iyaga u shaqeeya, xaqna ay ugu leeyihiin iney hubiyaan kulana xisaabtaan tilaabo kasta oo ay qaadayaan madaxdu mucaarad & muxaafidba, markaa ayaa la heli doonaa bulsho danaheeda ilaashata oo u diyaar ah iney ixtiraamto fekradaha dalka waxtarka u leh ee wax lagu dhisayo ee aan wax lagu dumineyn, Maxaa yaab isdabayaal.!!!

WARBIXIN: MAXAA LOO WADA AAMUSAY.!! WQ/-Dulyar

Abdulkadir dulyar Monday, December 9, 2024

MAXAA SIYAASADDA SOOMAALIYA ISBADEL U DIIDAN.? WQ/Dulyar

Waxaa laga yaabaa inaad isweydiineyso, sababta ay Siyaasadda Soomaaliya isku bedeli la’adahay.? Siyaasadda dunida, mar haddii qof fursad loo siiyo inuu dalkiisa u adeego, marka uu waqtigu ka dhamaado, hadii aan marlabaad dib loo dooran wuxuu raacdaa danihiisa kale, inta badana mardambe dadka ma hor yimaado, ama waxaa dhacda in marlabaad fursad kale la siiyo si uu shaqadiisa u sii wato, markaana marka ay mudadu ka dhamaato wuxuu noqdaa ruux ku faraxsan inuu dalkiisa iyo dalkiisa u soo shaqeeyay, wuxuuna ka mid noqdaa bulashada, waa haddii uu wax wanaagsan qabtay, haddii kale waxaaba dhacda in intuu qalad Siyaasadeed galo isaga oo aan waqtigii la doortay dhameysan in lagu rido cod dadweyne ama mid baarlamaan, markaasna iska daa inuu mardambe dadka hor yimaadee wuxuu ka qariyaa wajigiisa. Balse, Soomaaliya waxaa sanad walba doorashada isku soo taaga 20 qof oo istaqaana, Annaguna aan naqaano, kuwaas oo marna mucaarad isla ah marna muxaafid isla ah, ha noqdo mid mar fursad la siiyay oo aan waxba qaban, ama ha noqdo mid 9 doorasho galay oo aan marna ku guuleysan, ama ha noqdo mid boogo badan lagu ogyahay isaguna isku og, ama ha noqdo mid ku faanaya in dalkii shalay watay maahane uu doorkaan dalkale wato, meeshaan lama kala xishoonayo, waxaadba moodaa in lagu yiri, Siyaasadda Soomaaliya keligiin baa xaq u helaye ku baashaala, Marka goormee iyo sidee baa Siyaasadda Soomaaliya isku badeleysaa, marhaddii aaney jirin biseyl & isbedel hogaamineed & mid shacab, iyo in fursaddaha Siyaasadda la wadaago, waxna laga siiyo dadka kale ee xambaarsan aragtiyaha ka duwan kuwa aan ku soo daalnay. •Waxaa kawaas la mid ah Baarlamaanka dalkeena oo ah halbowlaha dhiiga siiya dowladnimada, waxaad arkeysaa xildhibaano 15-20 sano golaha dhex fadhiya oo iska daa wax ay dalka & dadka ku soo kordhiyaane aan magacyadooda la aqoon, waxaad kaloo arkeysaa kuwa sanad walba soo iibsada kursiga oo meesha u jooga ganacsi Siyaasadeed, waxaad kaloo ku arkeysaa dhalinyaro yaryar oo in lagu adeegto darteed loo soo geliyay baarlamaanka oo aan warba u heyn masuuliyadda weyn ee dalka ka saaran, kuna mashquulsan dano kooxeed iyo TikTok, Dabcan majiro Arday inta 2 jeer ku dhacay Final Exam-ka jaamacadda, hadana weli u xiisa qaba inuu mar sadexaad iyo mar afaraad u fadhiisto isla imtixaankii, isagoo aan almiino meel kale uga wareegin meeshaan uu ku fashilmay, , sidee marka Siyaasiyiin teenu ugu qanceen iyagoo labo & sadex jeer ku guuldareysatay doorasho, ama mar fursad la siiyay oo aan wax isbedel ah la imaan, iney hadana mar 4aad & mar 5aad na hor yimaadaan iyagoo u sharaxan isla kursigii, kuwaas waxaa iyaguna la mid ah kuwa Gu' walba raba iney dowladdii timaadaba Xildhibaan & Wasiir ka helaan. Finally, waxaan kula talinayaa wajiyada siyaasadeed ee 20 ka sano na hortaagan, ee tabar tooda iyo taag tooda na tusay, waxna nagu soo kordhin waayay, meeshu maaha Filimadii "NIGERIA MOVE-A" ee fadlan Siyaasadda kadib nolol kalaa jirtee, iska nasta oo fursad siiya dadka kale oo laga yaabo iney xambaarsan yihiin fekrado kuwiina ka duwan, ileyn dalka waa leydinla leeyahaye.!! NB/-Waa Aragtideyda gaaban/- Maxaa Yaab Isdabayaal.

MAXAA SIYAASADDA SOOMAALIYA ISBADEL U DIIDAN.? WQ/Dulyar

Abdulkadir dulyar Thursday, December 5, 2024

WARBIXIN: BARO INAAD IS DHAGEYSATO.!!.!!

Nin oday ah oo sii dhimanaya ayaa ku yidhi dhakhtarkiisa ​​isagoo sariirta bukaanka ku jira "Dhakhtar, ha werwerin, waan ogahay inaan dhimanayo, ma doonayn inaan halkan imaado balse halkan ayay i keeneen. Fadlan ha iga welwelin, hadda timahayga way baxeen. Aad baan u da' weynahay, Adna aad baad u yar tahay. Wax badan ayaan nolosha ka bartay, haddii aadan dhibsan waxaan kuu sheegi doonaa qaar ka mid ah intaanan dhiman. Markii aan jiray 4 sano, waxaan u isticmaali jiray in aan ku fekero in dunidu ay Aniga igu saabsan tahay. Markii aan 14 jirsaday waxaan rabay inaan dunida xukumo. Waxaan moodayay inaan noqon doono Ninkii ugu weynaa ee abid noolaa. Markii aan ahaa 21 Jirka, waxaan doonayay inaan noqdo Ninka dunida ugu taajirsan, markii aan ahaa 25 Jir, waxaan doonayay in aan helo jacayl, markii aan ahaa 40 Jirna, waxaan doonayay in aan caawiyo qof kasta. Hadda oo aan halkan joogo waxaan rabaa inaan dhinto. Waad aragtaa sow maaha, waxaan rabay waxyaabo badan inaan sameeyo. Tan ugu muhiimsan, waxaan rabay inaan faraxsanaado. Waxaan u maleeyay in sida ugu wanaagsan ee lagu farxo ay tahay in la dhageysto dadka kale. Markii aan damcay in aan galo Jaamacadda, waxa aan damcay in aan barto Zoology-ga, laakiin qof kastaa waxa uu igu yidhi, waa in aad barato Engineering si aad u noqoto Engineer weyn. Markaa waan dhegaystay. Ma haysan cid iga bixisa khidmadahayga, waxaan ku khasbanaaday in aan shaqeeyo oo aan sidoo kale bixiyo kharashka. Sannadkeygii saddexaad, waan la qabsan kari waayey waxbarashadeyda, waxeyna noqotay inaan ka tago. Markii aan ka tegay waxbarashada, isla dadkii ayaa igu yidhi "Waxay ahayd inaad barato cilmiga xayawaanka"! Markii aan 28 jirsaday, qof kastaa wuxuu igu yidhi waa inaad guursataa, waayoo waxaad u baahan tahay Xaas,. Markaa waan dhegaystay, waan guursaday. 6 sano kadib markii aan guursaday, waxaan ku qabtay xaaskeyga oo la seexaneysa deriskayga. Sababta ayaan waydiiyay, wayna i dhirbaaxday. Waan xanaaqay oo waxba ma odhan. Maalintii xigtay oo aan ka soo noqday shaqada, iyada iyo carruurteydiiba waa waayay, hadda oo aan dhimanayo waxaaan ahay Nin cidlo ah. 40-kii, waxaan helay qandaraas weyn. Magacaygu wuxuu ahaa warka. Maalintii xigtay dhammaan asxaabta iyo qoysaskuba waxay joogeen gurigayga, qof kastaa dhibaato weyn ayaa haysatay, Muddo hal toddobaad gudaheed ah, waxaan ku kharash gareeyay dhammaan lacagteydii, iyaga oo dadku Ii ballan qaaday in ay dib iigu soo soo celiyaan lacagta sidii ay ballantu ahayd. Markaa kadib waxa la xidhay 6 sano oo xadhig ah. Markaan ka soo baxay jeelkana qofna iima imaan. Waxa jiray hal qalad oo aan sameeyay wakhtigaan oo dhan. balse Hadda way ii caddahay. Aan kuu sheego. Waxaan diiday in aan naftayda dhegeysto. Nafteyda ayaan iska indha tiray oo dadka kale ayaan dhegeystay, Hadda oo aan halkan joogo qofka keliya ee ila jooga waa naftayda. Waad arkaysaa, aad bay u wanaagsan tahay in la dhegeysto dadka kale. Aad bay u xikmad badan tahay inaad talo ka raadsato dadka kale. Laakin aad bay khatar u tahay in aad iska indho tirto naftaada. Aad bay khatar u tahay inaad diiddo inaad u fiirsato wadnahaaga. Markaad guriga timaado caawa, fadhiiso, qaado koob biyo ah. Indhaha xidh haddii aad rabto ama fur haddii aad rabto, dabadeed naftaada la hadal, naftaada u caqli celi. Waxaad ku socon kartaa wadada kaligaa, oo markaad socoto, bilow inaad la hadasho naftaada. Qofka kaliya ee naftaada xukumi kara waa Allah ee dhegayso, marka xigta dhegeyso naftaada, Waan ogahay in aanay hadda macno badan kuu samaynayn, laakiin mar walba xasuuso in aan kuu sheegay.!! W:Q_Xasan cali mursal •BARO INAAD IS DHAGEYSATO.!! Maxaa yaab isdabayaal

WARBIXIN: BARO INAAD IS DHAGEYSATO.!!.!!

Abdulkadir dulyar Saturday, November 23, 2024

QISO DHAB AH:-JACEYL AAN LA AAMUSNAA 4 SANO.!! WQ-Dulyar

JACEYL AAN LA AAMUSNAA 4 SANO.!! Waa xiligii ardeynimadeyda, waxaan ahaa glass ka koowaad ee dugsiga sare ee Baarbe oo ku yaalla degmada Dharkeynleey, waxaan isku fasal aheyn wiilal & gabdho aad u dedaal badan xaga waxbarashada, marka la gaaro bareega dhamaateen waxaan dibadda uga baxnaa glass ka, oo waxaa la wada aadaa maqaayad yar oo ku dhex tiilay Schoolka oo lagu iibiyo Sheetaro sheetaro, waxaana wax lala wadaagaa hadba ardeygii uu maalintaa jeebkiisu qoyan yahay.maalmaha ay naga jajaban tahayna, inta dacaska gedino ayaan rigoore rigoore ku ciyaari jirnay glass-ka dhexdiisa ilaa inta laga soo noqonayo. Waagaas Gabdhaha iyo Wiilashu waxey ahaayeen isku lebis “Suweel iyo Shaar”waxaan ku kala duwaneyn oo keliya gambada madaxa u saaran, lama kala soocneyn oo waa leysla fadhiisan jirey,misna naguma jirin Wiilasheena qof ka mid ah oo maalin lagu xantay, in ay heblaayo glass ka nala dhigata wax ka dhexeeyaan, waxeyna noo wada ahaayeen dhamaantood walaalaheen oo kale, aadna waan u ixtiraami jirney, mararka qaar waxaaba dhici jirtay inaan dartood dagaal u galno, marka mid ka mid ay dulmiyaan dhalinyarada kale ee Schoolka nala dhigata, dhamaan intii aan isku glass-ka aheyn waxaan isla dhameysanay ilaa Form 4, Hadaba, waxaa jirtay in sanadkii koowaadba aan Anigu Jaceyl yar oo caato ah u qaaday gabadh dhigata glass-ka nagu dhegan ee B2 oo la saaxiib ah gabadh aan isku glass nahay, gabadhaasi maalin kasta marka la gaaro bareegga iyo marka xiisaduhu dhamaadaan ee la baxayo, waxey u timaadaa gabadha aan isku glass-ka nahay, jaceylkeyguna waa mid ka beernay aragtideeda, waayoo waxey aheyd gabar ilaaheey qurux gaar ah oo nooca aan Anigu ugu jeclahay dumarka uu ugu deeqay, sidaas daraadeed waxaan jeclaa inaan maalin walba arko marka ay saaxiibteed u imaaneyso, maalinta aan waayo waxey ii aheyd maalin baas oo xaalkeygu ma degana, xitaa ma awoodo gabadhan aan isku glass-ka nahay inaan weydiiyo, waxa maanta ku dhacay saaxiibteed, ee waxaan welwelkeyga ku gaaraa ilaa maalinta xigta ee aan ka arkayo, Anigu ilbax kuma aheyn dhanka jaceylka,iyaduna iimaba ogeyn inaan jeclahay, markii aan u soo wada gudubnay Foom 2 , ayaa waxaa dhacday inaan maalin inta naf isgeliyey aan kalmado kaftan ah ku tuur tuuray, hase yeeshee jawaabtii ay i siisay iyo dhoola cadeyn teedii ayaan mar labaad awoodi waayey inaan hadalka la sii wado, maalintaasna galinkii dambe oo dhan casharadii la qaatey Anigu waxba kalama socon ee glass ka waan iska dhex fadhiyey, waxaana ku soo celceshanayey jawaabtii ay siiyey iyo qosolkeedii yaraa, kaas oo igu sii beeray dareen kale oo awel iga dahsoonaa, mararka qaar habeenkii ayaan isku soo dhiirigeliyaa inaan biri la hadlo bal si aan isugu soo dhawaano, misna maalintii markaan arko baraf baan noqdaa, oo markaan fursad u helo waxaan kala hadlaa casharada Schoolka iyo wax aan loo joogin. Waxaan sidaa ahaadaba, waxaa la gaaray sanadkii 4aad oo ah sanadkii ugu dambeeyay Schoolka, labadayadu markaa waxaan noqonay kurayo si fiican loo korshay oo kale, waxaana la soo baxnay dhaldhalaal indho qabad leh, hase yeeshee midkeen waxaa heysta ayaandaro weyn oo ah Jaceyl keliyeystay naftiisa, waxaan bilaabay inaan iyada iyo saaxiibteed maalin kasta marka Schoolka laga baxayo aan ku soo lug darsado, labada gabdhood waxaa gurigoodu sokeeyaa mida aan isku glasska nahay,tan aan jeclaheyna waxoogaa ayey ka durugsan tahay,oo marka ay gurigooda nooga leexato waxaa isku soo harna Aniga iyo Inanta aan jeclahay,Alla markaas cabsi weynaa , .....waayoo waxaad moodaa in waxkasta oo kaftan iyo qosol ahaa ee 3 deena noo soo socday ilaa Schoolka iney la tagtay gabdhii naga leexatay, oo waxaan soo baraarugaa marka la gaaro saaxiibteey gurigooda oo markaa dhegaheygu waxey maqlaan,NABADGELYO WALAAL, markaa ayaan canaan iyo hiiftan kula dhaqaaqaa, nafteyda doqonta ah ee awoodi weysay iney dhibkeeda sheegato, waxaana maalmaha qaar marka aan gurigeena tago Anigoo aan iska bixin dharkii Schoolka isku tuuri jirey sariirta xanaaq dartii, markaas ayaa la i moodi jirey inaan xanuunsanahay. War yaan idinku daaline, gabadhii Anigoo sidii u jecel ayaa Schoolkii naloo xirey, reerkoodiina waa ay ka guureen meeshii aan ku ogaa, markaas ayaa ciil iyo shalaay iyo wax walba oo murugo ah dusheyda ku dagaalameen, hase yeeshee waxaan markii dambe bal si aan u nafiso maalin uga sheekeeyay xaaladdii aan 4ta sano ku sugnaa gabadhii aan isku glasska aheyn iyadana ay saaxiibada ahaayeen, ilaa ay indhaheeda ilmo ka soo daadato oo ay ugu canaanato maxaad mar hore iigu sheegi weyday, Anigaa kaa gaarsiin lahaa oo weliba kula garab geli lahaaye. ......Waa goorma waa goor ay xeero iyo fandhaal kala dhaceen.......Alla ciil weynaa....toloow hadda dib ma u heli doonaa......oo miyey quruxdii aan ogaa sidataa......Yeelkeede iyadu ma i xasuusataa.....horta ma nooshahay...MOOYI Maxaa yaab isdabayaal.!!

QISO DHAB AH:-JACEYL AAN LA AAMUSNAA 4 SANO.!! WQ-Dulyar

Abdulkadir dulyar Tuesday, November 19, 2024

WARBIXIN: MATAG MEESHAAD RABTO KUGUMA SIMO.!! WQ-Dulyar

KHUDBADDII MAANTA EE RW HAMZA & TALOOYIN KOOBAN:- Aan ka soo qaato 3 qodob oo kala ah: -In 21 sano kadib ay dhamaan ciidanka Jubaland yihiin deblayaal aan wax darajo ciidan ah laheyn. -In Abdirahman Irro uu ku guuleystay doorashada madaxtinimada Somaliland, Xili aysan weli natiijada ku dhawaaqin guddigii doorashada Somaliland. -Iyo in ujeedaddii munaasabadda oo aheyd Xil wareejin Qaranka muhiimad weyn ugu fadhiday, uu maanta RW Xamza u weeciyay dagaalka dowladda dhexe iyo Axmed Madoobe ka dhexeeya. •Qodobka koowaad: halka uu ka yiri RW Hamza, laga bilaabo maanta dhamaan ciidamada Jubaland waa deblayaal, haddii uu ka oran lahaa MD HSM, halkaas waxaa markiiba ka rakibmi lahaa qodob sharciya, sida uu qabo Destuurka dalku, waxaana dhamaan hal bacaad lagu lisay noqon lahaa derajooyinka ay sitaan ciidanka kala duwan ee Jubaland, haddase waa mid ku kooban aragtida RW. •Qodobka 2aad: dad badan waxey is weydiinayaan sababta uu RW Hamza uga hor dhacay natiijada doorashada Somaliland,!! oo waxey leeyihiin waxey aheyd inuu Reysalwasaaruhu arinkaa ka gaabsado, haddiise uu ka baaqsan waayay, kuma habooneyn inuu ka hor dhaco natiijada doorashada, waayoo waxaa hadalkiisa loo qaadan karaa inuu yahay mid sii xoojinaya, dooddii uu horey u qabay Xisbiga Kulmiye ee aheyd, in Xisbiga Wadani iyo Murashaxiisa laga taageero Koonfurta Soomaaliya. •Qodobka 3aad, maadaama sida la sheego ay Ciidamadu ka madax banaan yihiin siyaasadda, waxaa fiicneyd in RW Hamza uu maanta hadaladiisa ku koobo ujeedka munaasabadda, oo aheyd Xil wareejin labo Taliye oo ku kala wareegaya ciidanka ugu awoodda badan Qaranka Soomaaliya, kuwaas oo ka filayay Reysalwasaaraha tilmaamo, talooyin, dhiirigelin iyo in uu abaalmarino iyo farxad la qaato Saraakiisha iyo guud ahaan Ciidanka XDS, Balse sida dhacday, waxey mar qudha goobtii ay munaasabaddu ka socotay isku bedeshay, goob uu dhex taagan yahay RW cadheysan oo fariimo siyaasadeed iyo kuwa hanjabaadaba u gudbinaya maamulka Ahmed Madoobe oo ay dowladda dhexe xurgufi kala dhexeyso iyo ciidanka Jubaland , heer uu ku tilmaamay ciidamada Jubaland iney 21 sano kadib ay dhamaantood yihiin deblayaal, Sikastaba, waxaa wanaagsan in marka ay madaxdu goob tegayaan, inay dareenkooda ku koobaan madal walba & hadalkeeda, islamarkaana aaney khudbaddooda ka dhigin mid isku dhex karis ah, haddiise uu xaalku ka noqdo “Matag meeshaad rabto kuguma simo,” waxaa halkaa ku lumaya ujeedka munaasabadda iyo dareenka dadka loo qabtay, sida tii dhacday maanta oo kale, •WAA ARAGTIDEYDA GAARKA AH-Mahadsanidiin/- WQ: Dulyar Maxaa yaab isdabayaal div class="separator" style="clear: both;">

WARBIXIN: WAA KUMA AQOONYAHAN.? WQ/- Dulyar

=WAA KUMA AQOONYAHAN.? “Aqoonyahan waxaa ah midka ka hadla waxa dhacaya inta aaney dhicin, balse aqoonyahan ma aha midka ka hadla marka ay wax dhacaan” AAN HOOS U DAADAGO :- Tusaale, Annaga aqoonyahan keennu waa kuwa had iyo goor ka hadla oo kaliya marka ay wax dhacaan kadib, sida marka madaxda dalku Siyaasadda isku qabato kadib, marka qarax & amnidaro dhacdo kadib, marka shir caalamiya dalka lagu qabto kadib, marka Federaalka leysku qabto kadib, marka destuurka lagu xadgudbo kadib, marka dowladdu heshiis caalamiya soo saxiixdo kadib, marka dowladdu mowqif ka qaadato khilaaf dalal kale kala dhexeeya ama kan caalamka kale ka dhaca kadib iyo qodobo kaloo badanba. Kuwa markaas ka hadla warbaahinta ama doodaha Tv-yada ka soo muuqda ama qoraalada ka soo qora dhacdooyinkaas dhacay laguma tirin karo iney yihiin aqoonyahano. ee waa Afmaallo ,Qalin maallo & Xusuustayaal. Balse, waxaa aqoonyahan dhab ah lagu tilmaami karaa, kuwa ka hadla ama odorosa xaaladaha dalkooda ama tan caalamku markaas ku sugan yahay siyaadad, amni,cadaalad,horumar, dhaqan iyo dhaqaale ahaan,iyo waxyaabaha ka qaldan ama u hagaagsan & waxa ka imaan kara iyo sida ugu haboon ee looga hortagi karo ama looga gaashaaman karo waxyaabahaasi inta aaney dhicin, si ay markaas caalamka ama madaxda dalkooda iyo shacabkuba uga wada faa'ideystaan talooyinkooda, tilmaamahooda iyo fogaan aragoodaba, Kuwaas ayaa ah aqoonyahan dhab ah, kuwaas ayaa ah kuwa ku faani kara iney bulshada ka horeeyaan xaga aqoonta iyo garaadka, kuwaas ayaa ah kuwa dalkooda iyo dadkooda iyo caalamkaba ka badbaadin kara qataro ay ka dhaxlaan ficiladooda,Kuwaas ayaana ah kuwa bulshada u sahmin kara ama u sawiri kara caalamka ay ku riyoonayaan iney mustaqbalka ku noolaadaan, sida uu u ekaan doono muuqaal ahaan, horumar ahaan,cadaalad, amni, dhaqaale, siyaasad, nidaam & Kala dambeyn, & weliba sida ay dadku ugu dul noolaan doonaan hadii Alla idmo. FG:-Ugu dambeyn, aqoonyahanka Soomaaliyeed ma yahay mid doorkaas qaadan kara, mise waa mid ay aqoontiisu ku kooban tahay un marka ay wax dhacaan in uu ka hadlo.? Mahadsanidiin/- Maxaa yaab isdabayaal.!!!

WARBIXIN: WAA KUMA AQOONYAHAN.? WQ/- Dulyar

Abdulkadir dulyar Thursday, November 14, 2024

WARBIXIN: TARAAWIIX SIYAASADEED..!! WQ: Dulyar

WARBIXIN: TARAAWIIX SIYAASADEED.!! Siyaasiyiinta Somalia 🇸🇴, 4tii sanaba mid baa guursada islaantan baas ee layiraahdo Dowlad oo ah islaan xanuunsan, wuxuuna rabaa isagoo aan daaweyn oo aan dhakhtar geyn ama aan Qur’aan saarin iney ubad kheyr leh u dhasho. Bal u fiirso, 20 kii Sano ee la soo dhaafay, hadba Siyaasi qooqan ayaa yiraahda anigu waxaan caashaqay Islaanta Dowlad layiraahdo ee uu Hebel ka ilmo dhali waayaye doorkaan haleygu tijaabiyo.markii lagu nikaaxo oo loo mashxarado loona guri geeyo, ayaa halkii laga filayay inuu bog cusub u furi doono dowladnimada, waxaa durba la arkaa isagoo kula meereysanaya isla jihadii ay ku soo jabeen raggii isaga kaga horeeyay Islaanta . Nasiibdaro maalinta ugu dambeysa ee la gaaro waqtigii loo qorsheeyay inuu islaanta xanuunsan kaga ilmo dhalo, ayuu isagoo aan waxba fara ku heyn bilaabaa gabgableyn iyo inuu ku doodo, war Islaanta sidaan ma moodeyne hadaan shiishka meel fiican ku hayaaye mudada haley kordhiyo, ama hadaad xarfaan tihiin 4 kale haleygu cimaamado Nacalaa sheydaan ku yaalle. Markaa ayaa meel walba buuq ka bilowdaa, maadaama ay islaantan baas ee xanuunsan ay saf dheer ugu jiraan , Rag badan oo uu mid walba aamisan yahay inuu isagu yahay kan ku haboon ee labo xaniinyoodka ah ee ka ilmo dhali kara, balse kuligood been bey wada sheegayaan, waayoo Ninkasta oo nasiib u yeesha in lagu mehriyo Islaanta, marka loo guri geeyo laguma karo, hooge War marka hore dhakhtar gee oo caafimaad keeda soo baar, waa intaas oo loo helaa daawadii aad kaga Ilmo dhali laheyde. Waxaad na moodaa in Siyaasiyiinta Soomaalidu ay dadkooda tujinayaan Taraawiix Siyaasadeed oo ma dhamaato ah ama ay ugu celcelinayaan hal Filim oo ay dadku daawashadiisa ku caajiseen, kaasoo 4tii sanaba ku soo dhamaada iyadoo dhooqada dhexdeeda lagu legdamayo, mana laga yaabo in la arko siyaasi intuu meel fagaaro ah soo istaago dadkiisa ku yiraahda, anigu islaantii aad igu darteen xilli ciyaareed keyga waan ka Ilmo dhali waayaye waa tanaaye xarigeeda iga qabta, si ay markaa waxgaradka bulshadu arinka uga wada tashato, oo ay marka hore Islaanta dhakhtar u geeyaan una soo daweeyaan, Qur’aan saarna u soo raaciyaan, dabadeedna ay ugu mehriyaan Hogaamiye han & hiraal fog leh oo wax ka bedeli kara hanaankii horey loogu soo tijaabiyay reerka, waa intaasoo uu Ilaaheey UBAD ugu deeqaa, inta aaney Islaantu dhaqmaad deyn, dabadeedna ay Soomaalidu ka salaama naqsataa TARAAWIIXDAN SIYAASADEEDE.!!! i NB:- Farqiga u dhexeeya Siyaasi & Hogaamiye:- -Siyaasigu wuxuu ka fekaraa doorashada soo socota. -Hogaamiyuhuna wuxuu ka fekaraa Jiilka soo socda.!! Maxaa yaab isdabayaal

WARBIXIN: TARAAWIIX SIYAASADEED..!! WQ: Dulyar

Abdulkadir dulyar Monday, November 11, 2024

WARBIXIN: XILDHIBAAN MAALINTIINA U FEKER SI QARAN, HABEENKIINA SI XAAFADEYSAN.!! WD Dulyar

AAN ISKA GARDAROODEE, horta Xildhibaanada Federaalku waa xildhibaano Qaran, waxa ay ka shaqeynayaana waa dano Qaran, sharciyada dalkuna waa sharciyo Qaran oo la rabo in mustaqbalka dhow iyo kan fogba lagu dhaqo dalka iyo dadka Soomaaliyeed. Halkaas markeey taagan tahay, waxaa ayaandaro ah in doodaha Xildhibaanada laga dhadhansado sida sharciyada dalka iyo la xisaabtanka Xukuumadda loogu rogay kuwa ay reero kala wataan ama ay kala difaacdaan, in sidaasi dhacdana waxaa sababteeda iska leh Baarlamaankii loo igmaday toosinta & turxaan bixinta sharciyada dalka & la xisaabtanka Hey’adaha Dowladda. Marka aan sidaa leeyahay, iskama lihi ee Baarlamaanka ayaan kol hore ka dhegeystay iyadoo xildhibaan uu leeyahay,sharcigaan Annagaa wadanee hala meel mariyo, hana leygu xushmeeyo maanta oo yaan leyga daba hadlin. -Waxaan kaloo dhegeystay Xildhibaan ka hor hadlaya golaha oo leh:- Aniga Wasiirka sharciga keenay meel baan qaraabo ka nahay, marka waxaan taageer sanahay in sharcigaan la meel mariyo. -Markale waxaan dhegeystay Xildhibaan isna ka hor oranaya golaha,:- Annaga Wasiir keena maxaa loogu adkeynayaa sharciga, Wasiirada kaleba laguma adkeeyee, waxaas waxaan u arkeynaa in dano kale nalaka leeyahay. -Baarlamaanka maanta cabsi cabsi waaye, qofkii lala hadlaba waxaa soo garab istaagaya qabiilkiisa, waxaana codsanayaa Annagu Umadda oo dhan ayaan matalnaaye in laga daayo doodaha Baarlamaanka qabiilka, sidaas waxaa Saxaafadda ku tiri: xildhibaanad malaha ka cadheysan habka su’aalo weydiinta mid ka mid ah Wasiirada DFS. Waxaan kaloo marar Kala duwan u soo joognay Xildhibaano Qaran oo marka uu Madaxweyne Goboleed koodu dowladda dhexe ka cadhoodo iyaguna la cadhooda oo uu diyaarad ku xambaarto, halkii ay aheyd iney iyagu xaliyaan khilaafyada destuuriga ah ee soo kala dhexgala Madaxda sare ee dalka iyo kuwa maamul Goboleedyada, maadaama ay iyagu awoodaan hadii uu qaladku ka jiro dhanka hogaanka sare ee DFS iney wax ku xaliyaan golayaasha dhexdooda, hadii uu ka jiro dhanka Madaxda M/Goboleedyadana ay runta u sheegaan. Ma rabo inaan halkaa u dhaafo, mana aha Sheekadaani mid ku cusub gudaha 2 Aqal ee Baarlamaanka, ee waa arin si hoose mudo dheer u soo jirtay, balse aad moodo iney gaartay in kor loo yiraahdo, Sikastaba, waxaan xubnaha 2da Aqal ee Baarlamaankeena kula talinayaa, Mudanayaal waan ogahay in ay qabiilo idin soo doorteen, waana ogahay birina inaad rabtaan iney Qabiiladu dib idiin soo doortaan, oo aad isleedihiin hada waji ka sii sameysta, balse waxaad awoodaan inta laga gudbayo nidaam xaafadeed kan 4/5 ah, inaad maalintiina u fekertaan si Qaran,habeenkiina wax u xalisaan si xaafadeysan.!!! Maxaa yaab isdabayaal.!!

WARBIXIN: XILDHIBAAN MAALINTIINA U FEKER SI QARAN, HABEENKIINA SI XAAFADEYSAN.!! WD Dulyar

Abdulkadir dulyar Thursday, November 7, 2024

WARBIXIN: DHAQAMO SIYAADO KU AH COLAADAHA QABAA’ILKA.!! WD Dulyar

Waayadaan dambe dagaalada dhexmara Qabaa’ilada ood wadaagga ah, waxaa ku soo kordhay Wiilal iyo Gabdho fidna wadayaal ah oo inta badan jooga meelo ka durugsan goobaha lagu dagaalamayo, si ay isaga soo duubaan muuqaalo iyagoo dhabarka dambe iska xijinaya ama {background} ka dhiganaya jabaqda rasaasta Wiilasha dagaalamaya. Wiilashan iyo gabdhahan oo mararka qaar xiran dress-ka Ciidamada, ayaa inta badan la arkaa iyagoo afka abur ka siideynaya kuna faraxsan dhiiga dadka walaalaha ah ee muslimiinta ah, islamarkaana baraha bulshada ku faafinaya hadallo colaad hurin, cunfi iyo xumaan xambaarsan, kana aradan anshaxa Muslinimada, ehelnimada iyo Soomaalinimada, Ma aqaan cid u xil saaratay howshaan, balse kooxdani waa kuwa inta badan baraha bulshada ku reeba muuqaalada naceybku ka muuqdo ee laga duubo colaadaha dhexmara Qabaa’ilka wada degan, waana kuwa faafiya muuqalada xusuusta reeba, xitaa hadii ay Reerihii wada dagaalamay ka heshiiyaan colaadooda, Dhanka kale, kooxdan Af ka noolayaasha ahi waa kuwa u sababta ah iney si joogta ah u damqiyaan qalbiyada ehelada ku waaya dagaalada sokeeye Wiilashooda & waalidiintood, iyo xitaa kuwa sida maxbuusnimada ah loogu qabto dagaalada, maadaama ay noqonayaan muuqaalada ay faafinayaan kuwa markasta ku soo noqnoqda xisuusta dadkaas. Sikastaba,kooxdaan goobaha ay Qabaa’iladu ku dagaalamayaan u tagta oo keliya iney iyagu muuqaalo isaga soo duubaan, waa kuwa had iyo goor isu muujiya iney yihiin dad balaayo ka dhacday oo hiil u ah reerahooda, reerka kalena ku diganaya, balse waxaan kula talinayaa iney ficiladan Ilaaheey uga cabsadaan, kana waantoobaan colaad hurinta iyo muuqaaladan naceybka xambaarsan ee ay faafinayaan, maadaama aysan iyaga u wanaagsaneyn mustaqbalkooda iyo aakhira dooda dambe. •BAAQ NABADEED:- Ugu dambeyn, waxaan codkeyga ku biirinayaa baaqyada nabadeed ee loo jeedinayo deegaan kasta oo ay maanta ku dagaalamayaan Qabaa’il Soomaaliyeed, waxaana leeyahay Soomaaliyeey colaadda halagu bedelo nabad iyo wadahadal, maadaama aynaan horey u soo arag dhowr iyo 30-kii sano ee aan dagaalameynay Qabiil Qabiil kale tirtiray iyo mid midkale qabsaday oo ay maanta maxbuus u wada yihiin, Si gaar ah waxaan Culimada, Waxgaradka, Aqoonyanka, iyo inta samaha jecel xusuusinayaa in ay mas’uuliyad weyni ka saaran tahay joojinta deegaan walba oo ay maanta colaadi ka jirto , haddii ay kaalintooda nabadeed ka gaabiyaan ama ay iyagu qeyb ka noqdaan colaaddana ha ogaadaan in uu birito Ilaaheey kula xisaabtami doono masuuliyaddooda. WABILAAHI TOWFIIQ/- Maxaa yaab isdabayaal

WARBIXIN: DHAQAMO SIYAADO KU AH COLAADAHA QABAA’ILKA.!! WD Dulyar

Abdulkadir dulyar Saturday, November 2, 2024

XASHKA BAB DHEH, WIXII KU JIRA HA SOO BAXEENE.!! WQ:Dulyar

Tan iyo markii ay bilaabatay xiisadda u dhexeysa Somalia 🇸🇴 iyo Ethiopia, sida aan la wada socono horey looma arag wax war ah oo ka soo baxay dhanka Madaxda Maamul Goboleedyada dalka, Sidaas daraadeed, mar haddii ay maanta intooda badan isku yimaadeen Madaxda Golaha wadatashiga Qaran, waa muhiim iyadoo laga faa’ideysanayo fursaddan iney si wadajir ah u cambaareeyaan damacii ay Ethopia ku soo haweysatay dhulkeena iyo Baddeena, iyo xadgudubyada uu Ciidankoodu ka wado Gobolada dalka qaarkood. . Majiro ayaan is leeyahay qodob ka muhiimsan oo lagu xariiqi lahaa war murtiyeedka ka soo bixi doona, marka uu birito soo xirmo shirka Madasha Golaha Wadatashiga Qaran “GWTQ”. Haddiise laga waayo war Murtiyeedka qodobkaas oo Caalamka & Ethiopia qudheeda u muujinaya in madaxda Soomaalidu ay ku mideysan tahay difaaca iyo ilaalinta Xuduudaha Dalkooda, waxey Madaxda M/Goboleedyada iyo Madaxda DFS labadaba ku noqon doontaa, fashil weyn oo muujinaya in Shirkoodu uu ahaa mid ay danahooda gaarka ah uga wada hadlayeen, ee uusan aheyn mid ay uga wada hadlayeen danaha guud ee dalka iyo dadka Soomaaliyeed. Soomaalidu waxey tiraahdaa, XASHKA BAB DHEH,WIXII KU JIRAA HA SOO BAXEENE, hadda bal 👀👀👀halagu wada hayo War Murtiyeedka ka soo bixi doona GWTQ, waxbaa salag lehe Maryooleey iinshallah. Maxaa yaab isdabayaal

XASHKA BAB DHEH, WIXII KU JIRA HA SOO BAXEENE.!! WQ:Dulyar

Abdulkadir dulyar Wednesday, October 2, 2024

ILAASHO RUUXA AAD DHIIGGA ISU SHUBTAAN.!! WQ/-Dulyar

Nin dhalinyaro ah oo halbowle ka go’an yahay ayaa Cusbitaalka la keenay, dhakhaatiirtiina waxey yiraahdeen waa in si Degdeg ah dhiig loogu shubaa bukaankan hadii kale xaaladdiisu waa qatar, waxaa goobta yimid 3 Wiil oo la dhalatay bukaanka, balse nasiibdaro sadexdaba isku dhiig wey noqon waayeen, xaalkiina wuxuu ka badin waayay in dadkale oo qaraabada ah teleefoono laga waco, Nasiib wanaag, Nin dhalinyaro ah oo Hospitaalka bukaan kale ku hayay ayaa wuxuu arkay xalaaddan cakiran ee meesha ka jirta, wuxuuna eheladii Wiilka dhiiga u raadinayey ku yiri, waa noocee dhiiga aad bukaanka u rabtaan,? mid ka mid ah ehelka oo aan rajo badan ka qabin Ninkaan ayaa ku yiri, waxaa loo baahan yahay dhiiga noocaas ah, Wiilkii ayaa ku yiri, Annaa bukaanka dhiiga u shubaya oo aan isku dhiig nahaye ina keena, mar qudha ayaa reerkii wada kulansaday farxad iyo iney Wiilka u mahadcelinayaan.qaarkood ayaa markii uu dhiiga u shubay isku dayay iney lacago siiyaan, balse Wiilkii waa uu ka diiday oo wuxuu ku yiri, Anigu dhigeyga waan sadaqeystay ee raali ahaada. Wiilkii dhaawaca ahaa oo xaladdiisu sii liidatay ayaa waxaa durbadiiba loo qaaday Saalada qaliinka iyadoo uu ku socdo dhiigii loo shubay, mudo yar kadibna waxaa laga soo saaray isagoo xididkii halbowlaha loo hagaajiyay xaalkiisuna wacan yahay. Eheladii Wiilka bukaanka ahaa oo markaan xaalkoodu Bravo yahay, ayaa inta Wiilkii dhiiga u shubay teleefoon ka wacay u mahadceliyay, maadaama uu horey ugu sheegay inuu qof bukaana Hospitaalka ku hayo, Wiilkiina wuxuu ku yiri, waa kheyr galabta ayaan idin soo booqanayaa iinshallah. markii uu galabtii soo booqday ayay Reerkii Wiilku si fiican u soo dhaweeyeen, waxaana loo geeyay Wiikii uu dhiiga u shubay, wada sheekeysi kadib, Wiilka bukaanka ahaa Edadiis oo qof weyn aheyd oo meesha joogtay ayaa Wiilkii ku tiri, Hooyo aan isbaranee Adigu Reerkee tahay, ? Wiilkii oo iska beesaani ahaa xoogaana qajilay ayaa ku yiri :- Reerkaas baan ahay, Maamadii su’aal dambe kuma celin, iyaduna uma sheegin Reerka ay yihiin, waayoo waxey ka baqday in Wiilku ka dido oo hadii dhiig kale loo baahdo uu u shubi waayo. laakiin waxeysan ogeyn in Wiilkaani uu ciyaal Xamar iska yahay oo uusan Qabiilka u aaminsaneyn sida ay iyadu u aaminsan tahay. Ka waran marka, hadii Adigoo bukaan ah oo xaaladdaadu halis tahay, dhiigna u baahan lagu keeno Cisbitaalka oo aad Walaalahaa iyo qaraabadaada isku dhiig noqon weydaan, balse uu dhiigiisa kuugu deeqo naftaadana ku badbaadiyo Ruux aadan aqoon oo aydnaan isku Qabiil aheyn, sow markaa lama oran karo marhadii Walaalahaa kula dhashay aysan dhiigooda naftaada ku badbaadin karin, Adiga waxaad walaal iyo ehel tihiin midka aad dhiiga isku shubi kartaan reerkuu doono ha noqdee, kaasaana u baahan inaad is ilaashataan oo aad dadka kale iska xigsataan. Dabcan, dhacdooyinkan oo kale waa kuwo si maalinle ah loogu arko Cisbitaalada dhexdooda, sidaas daraadeed sow ma haboona in bulshadeena lagu baraarujiyo arinkaan, si Qofwalba uu u ogaado in qofka kale ee uu Reer ahaanta u dilayo ama u colaadinayo uu yahay, midkii birito marka ay Walaalihiis iyo qaraabadiisa isku dhiig noqon waayaan. isagu naftiisa ku badbaadin lahaa dhiigiisa. halkaas markeey taagan tahay waxaan oran lahaa, QOFKA WAXEY ISKU QABIIL YIHIIN MIDKA AY DHIIGGA ISU SHUBAAN.!! Maxaa yaab isdabayaal. WQ/= Abdulkadir Dulyar

ILAASHO RUUXA AAD DHIIGGA ISU SHUBTAAN.!! WQ/-Dulyar

Abdulkadir dulyar Sunday, June 16, 2024