MARWALBA OO SOMALI LA JEEDALO,ASKARI TALYAANI AH AYAA U DHINTA.!!!

MARWALBA OO SOOMAALI LA JEEDALO, ASKARI TALYAANI AH AYAA U DHINTA.!!! •Adigu maxaad ku qeexi lahayd qofka Soomaaliga ah? Gerald Hanley oo ahaa qoraa Ingiriis ah, sidoo kalena askari ahaan u joogi jiray dhulka Soomaalida xilliyadii Dagaalkii Labaad Ee Adduunka ayaa isaga oo faallaynaya Soomaaliga iyo noloshiisa, ayuu buuggiisa sidaan ku sheegayaa, “ Waa qalayl, xaraarnimo, rafaad iyo qorrax maqaarka gubaysa,oo baahida iyo haraadka dhulkooda ka jiraa uu aad uga duwanyahay Afrikada barwaaqada iyo wada kaymaha ah, dhabtii ma jiraan dad ka dhibaato iyo shiddo badan dadka deegaankoodu ka bilowdo buurta Mount Kenya, kuna baahsan illaa iyo daadegga buuraha Abyssina [Itoobiya], ee dhanka kalena gaarsiisan illaa iyo fiinta Cape Gardafui [Raas Casayr ee Badda Cas] halkaas oo dabaylaha Xagaagu joogto yihiin, sidoo kalena Libaax-badeedyo waaweynaaday ay joogto u dhexyaacayaan badweynta biyaheedu khafiifka yihiin [bad aad u kalluun badan, ayuu uga jeedaa]. Marnaba ma sawiran kartid dugaagnimada (waalida) dadkaas adigoon arkin toorreeyada iyo warmaha ay sitaan, indhahooda cabsida leh. Timaha madoow, booraystay ee laalaabmaya. Waa geeljire madax adag, ku nool dhul kulkiisa aadan dhagaxa taaban karin, ku jira dagaallo dhiig-qubad ah oo aan la xasuusan karin sidii uu ku bilowday, balse lagu xuso in dhiig-qubadka la sii wado. Waxa Jinsiyado kala duwan ee ku nool Afrika, waa kuwa ugu wanaagsan in lagu dhex noolaado, waa kuwa ugu dhibta badan, iskula weyn, ugu geesisan, isula qumman, ugu naxariis daran, ugu saaxiibnimo fiican; waa Soomaalida.” Waxa aan aqaan baadari Talyaani ah [Masiixi ah], kaas oo soddon sano dhex wareegayey Soomaalida, balse labo qof oo keli ah ay raacday [rumaysay diintiisa], weliba waxa aan la sii yaabbanahay sida labadaas qof ay ku raaceen. Ma jiraan dad Nebiga [Muxamed NNKH] ugaga jacayl badan, haddana ugaga aqoon liidata (jaahilsan) Soomaalida, balse iyaga dambigooda ma aha in ay jaahiliin yihiin. Caqli badnaantooda dabiiciga ah (ay u dhasheen) ma jiro wax lala barbar dhigo, marka ay kacaannada waxbarashadu ay dhulkooda soo gaaraanna, dhabtii naftooda iyo Afrikaba waa ay ka yaabin doonaan.” Weligay ma arag Soomaali ka cabsanaya dhimasho, layaab ayey u muuqataa balse waxaaba u dheer naxariis-darrada iyo turiimo la`aanta. Haddii aadan dhimasho ka baqayn, cidkalena dhimasho ugama naxaysid, balse cabsi la`aantoodu saldhig ayey u tahay nolosha Soomaaliga ee joogtada ula halgamaya gaajo, cudur, iyo harraad, isaga oo haddana isu diyaarinaya in uu cadawgiisa la dagaalamo, cadawgiisa oo Soomaali kale ah uuna ku farxayo daadinta dhiiggiisa, ama cadawgiisa kale ee ah Itoobiyaanka doonaya in uu dhulkooda xukumo, ama cadawgaas oo noqon kara nimanka Caddaanka ah ee dhowaan ugu yimid dhulkoodii.” “Mar walba oo Soomaali jeedal lagu dhufto, askari Talyaani ah ayaa la dilaa” Intii aan dhul Saxare ah aan maray oo dhan, Soomaalidu waa dadka ugu caqliga badan ee aan arkay. Reer miyigaas qarniyo badan ku nool geela, ma la heli doonaa qof xal u hela sidii geesinnimada iyo caqli-badnaantooda looga faa`iidaysan lahaa?” Ma jiro aadane ka adadag reer miyiga Soomaaliga. Hal qof xataa. Askari ku dhaawacmay dagaal ka dhacay miyiga Hawd, 20 kiiloomitir ayuu lugeeyey isaga oo weliba calooshiisa gacanta ku celinaya (si aysan uga soo dhicin), haddii uu ka bogsaday dhaawiciina dib ayuu dagaalladii ugu laabtay. Ogoow, dumarkooduna waa kuwo naf ahaan u awood badan sida raggooda.” Waa in aad sidaas uga fakartid qofka Soomaaliga ah. Waa in aad sidaas uga fakartid, maxaa yeelay Soomaalidu godob weyn iyo nacayb ayey u hayaan ninka cad, waa kuwo joogto ula halgami doona oo beeno iyo iyo shirqoollaba u adeegsan doona sidii ay ula dagaalami lahaayeen ninka cad, iyo sidii ay uga hortagi lahaayeen saamayntiisa oo ay u arkaan dhammaadka dunidooda u goonida ah. Kama adkaan kartid, Uma arkaan in ay cidina iyaga ka sarrayso, sina kuma ogolaanayaan doonitaanka ninka cad, kamana cabsanayaan isaga, qorigiisa, iyo caradiisa midna. Waa jinsiyad (waa dad) xushmayn mudan, waa haddii ay adkaato in la jeclaadaba.” Fadlan walaal adigoo mahadsan Share dheh oo la wadaag walaalaha kale si ay u aqriyaan qoraalka. Buugga, WARRIORS: The Life And Death Among Somalis [DAGAALYAHANNO: Nolosha iyo Geerida Soomaalida Dhexdeeda} Tarjumid: Dr Jaamac Sahal Maxaa yaab isdabayaal

MARWALBA OO SOMALI LA JEEDALO,ASKARI TALYAANI AH AYAA U DHINTA.!!!

Abdulkadir dulyar Friday, November 5, 2021

WARBIXIN:- UMAD DHACAN OO KU FARAXSAN.!! WQ/- dulyar

-UMAD DHACAN OO KU FARAXSAN.!!! Markaan qoraalo badan oo Somali iyo Kenyan ba ay qoreen aan aqriyay, markaan dib u eegay habka ay dacwada baddeena u xalisay Maxkamada ICJ, markaan daawaday sida degdega ah oo ay Madaxdeenu u aqbaleen go’aanka ICJ, iyo markaan eegay dabaaldegga iyo damaashaadka Maryooleey, waxaa ii soo baxday in dadkeenu aaney si fiican u dhuuxin sheekada, islamarkaana aaney helin dad aqoon u leh arimahaan iyo waxa dhacay oo si fiican wax ugu faahfaahiya. Waayoo Kenya waxa ay markii horeba muranka gelisay waxey aheyd baddeena, waxa ay dacwadu ku saabsaneydna waxey aheyd baddeena oo nalaku qabsaday, xukunka ay maanta gaartay Maxkamadda ICJ na nuxurkeedu waa Kenya oo lagu maslaxeeyay qeyb ka mid ah baddeenii, balse nasiibdaro Annagii waxeena la qaatay baa ka farxad iyo damaashaad badnaanay Kenyaankii waxeena naga qaatay. Halkaas markeey taagan tahay, waxaa muhiim ah in leys weydiiyo dhowr arimood sida:- Kenya Ma waxaan cad badeedkaas u siinay laaluush maadaama ay wax ka badan nagu qabsatay, mise waxaan garowsanay in aynaan waqtigaan Kenya u babac dhigi karin awood ahaan oo aan intaan uga harno hadeey nooga qanceyso, mise waxaa jira qorshe ah inaan cadkaas Badda ahna aan ugu dareyno xisaabtii hore ee dhulka aheyd ee ay Kenya naga heysatay, si waagii Soomaaliya ay tabareysato aan awood ahaan uga soo ceshano waxeena.mise sida muuqata maba jiro wax qosha ah oo leysku raacsan yahay oo arinkaan meel nooga yaalla.. Ogaada hadii aan maanta cadkaa badda ah loo magac bixin oo Aan faan iyo dabaaldeg keliya uga harno, waxey mustaqbalka Caruurteenu taariikhda ka aqrisan doonaan in dhulkaas Kenya ay maxkamadi u xukuntay kadib markii ay iyaga iyo Soomaaliya isku qabsadeen, hadiise Aan maanta taariikhda ku qorno in Baddaasi ay la mid tahay Dhulkii NFD ee shalay Gumeystuhu Kenya naga siiyay, sidaas si la mid ahna ay maanta Maxkamadda ICJ iyaduna si qaldan cadkaas baddeena ah nooga siisay Kenya, waxa uu jiilba jiil ka dhaxli doonaa in Baddaas ay iyagu leeyihiin, sida aan Annaguba dadkii naga horeeyay uga dhaxalnay taariikhda ah in Kenya & Ethopia ay naga heysataan dhul aan Annagu leenahay oo uu gumeystuhu naga siiyay Tankale, Waxaa jirtay bilowgii hore hadeyba suurtagal tahay fursad aan racfaan uga qaadan karnay go’aanka Maxkamadda, waa hadii loyar radeena iyo madaxda noo joogtay Maxkamadda ay Markii uu go’aanku soo baxay inta aaney u dabaaldegin oo aysan iyagu isugu hambalyeyn ay galin lahaayeen tashi Qaran, balse hada racfaan kasta oo aan qaadano waxaa caqabad ku noqonaya aqbalaadii ay Madaxdeena Qaranku aqbaleen go’aanka ka soo baxay Maxkamadda, iyo khudbadihii iyo qpraaladii ay Madaxdeenu mucaarad iyo muxaafidba isku dhaafsadeen baraha bulshada, iyadoo weliba guul beenaadkaas libintiisa lakala jiidanayo. Tiiyoo ay Kenyana weli la aamusan tahay go’aan keeda rasmiga ah si ay uga fekerto sidii ay ku heli laheyd waxkale oo dheeriya. Ugudambeyn , wax kastaba ha dhacaane, bal si Biyaha 12% ah ee Loo xukumey Kenya aan u muujino inaan ka xumahey oo aynaan raali ka aheyn waa inaan dhamaanteen hoos u dhignaa dabaal-degyada iyo isku soo baxyadda, islamarkaana mar hadii ay inta badan dadkeenu howtal hamag yihiin oo aaney waxbadan ka fahamsaneyn qadiyayaddaan, waa muhiim in ay dadka aqoonta gaarka ah u leh Arimahaan oo kale ay xooga saaraan sidii ay Warbaahinta ula wadaagi lahaayeen faa’idadada iyo khasaaraha ka dhalan kara iyo sida looga lug bixi karo go’aanka shalay cad badeedkeena Kenya loogu xukmiyay. MB/-Waa aragtideyda gaaban.!! Maxaa yaab isdabayaal.!!! div class="separator" style="clear: both;">

WARBIXIN:-NAAFADA SOCIAL MEDIA.!! WQ-/-Dulyar

Waxaa jira dad badan oo isugu jira qeybaha ay bulshadu ka kooban tahay, oo aan jecleyn iney ka hadlaan ama ku milmaan Siyaasaddaha isdiidan iyo khilaafaadka madaxda, dadkaani sidoo kale ma jecla in ay fekrado ka dhiibtaan doodaha Qabyaaladeysan, wararka Umadda lagu kala fogeynayo, kuwa colaadaha ku saabsan, qoraalada lagula kala safan yahay Madaxda mucaarad iyo muxaafidba, iyo guud ahaan fekradaha kale ee aan Aduun iyo Aakhiraba waxtarka u laheyn bulshada. Waa dad Victim u ah hab fekerkooda wanaagsan iyo dal jaceylkooda oo ah mid ka sareeya sida ay u fekerayaan dadka tirada yar ee bulshada ku hogaamiya sheekooyinka niyad jabka iyo marin habaabinta xambaarsan, waana dad inta badan la aamusan aragtidooda oo u muuqda in la caburiyay,macnuhu maaha baqdin iyo iney jirto cid ka hortaagan iney hadlaan, oo soo bandhigaan flkradahooda, ee waxaa jira duruufo kale oo ku xeeran oo ku qasbaya iney aamusnaanta ka door bidaan iney ka hadlaan waxyaabaha hareerahooda ka socda, qaarkoodna waxaa laga yaabaa iney rumeysteen fekradaha ay xambaarsan yihiin in Aan waqtigoodii la gaarin, oo ay dadku hada Waxkale u jidbeysan yihiin. Runtii dadkaani waxey rabi lahaayeen iney Social Media ka helaan meelo looga doodayo, ama dad la soo wadaagaya qoraalo ka hadlaya,Dalkeenu meesha uu u socdo, waxyaabaha naga qaldan ee toosinta u baahan, Sidee loogu nool yahay Qurbaha, mustaqbalka sidee loo mideyn karaa dhaqamada Qurbajoogta iyo Qorax joogta, Arimaha Dib u heshiisiinta,Nabadda, Fahamka Dowladnimada, Taariikhda, Dhaqaalaha dalka, ka hortaga musuqmaasuqa, horumarka iyo dib u dhaca dalka ka muuqda, Qiimaha maciishadda, sababaha ay dhalinyaradu dalka uga cararaan, barakacayaaasha dalka gudihiisa ku barakacsan iyo sida xal loogu heli karo, kheyraadka dalkeena,,Caafimaadka iyo cudurada ugu badan ee dalka ka jira, Sports ka, Tiknoolajiyadda,Tayada Waxbarashada dalka, Arimaha qoyska, Wax soo saarka Dalkeena, Ganacsiga dalka, maxey bulshadu u baahan tahay, Wabiyada dalkeena sidee looga faa’ideystaa, wacyigelinta bulshada, ,iyo boqolaal qodob oo kale oo mudan in dadkeenu ay ka doodaan ama ka hadlaan, fekradahoodana isku dhaafsadaan. Anigu koleey dadkaas waxaan u bixiyay NAAFADA SOCIAL MEDIA, waxaana iyaga kula talin lahaa iney fekradahooda la soo banaan baxaan intii ay la aamusnaan lahaayeen, waayoo dadka Social Media isticmaalaa ma wada xuma balse waxey waayeen wax u bedela kooxaha yar ee hada maskaxdooda ka dhigtay bakhaar ay ku keydsadaan badeecada hooda raqiiska ah ee aan waxtarka u laheyn naftooda iyo dalkooda , sidoo kale waxaan ka codsanayaa dadka magaca leh,ama dadka saameynta ku leh Social media, iney dadkaas la aamusiyey siiyaan fursado ay ku nafisaan,bulshadana kula wadaagaan aragtiyadooda Caafimaadka qaba ee waxtarka noo wada leh. Mahadsanidiin/- MB/- Inta yar ee fikradaha wanaagsan iyo wacyigelinta bulshada ka wada Social Media , Saaxiibayaal idnma iloobin waadna ku mahadsan tihiin.. Maxaa yaab isdabayaal.!!

WARBIXIN:-NAAFADA SOCIAL MEDIA.!! WQ-/-Dulyar

Abdulkadir dulyar Monday, September 20, 2021

WARBIXIN:- GURIGAN GUBANAYA YAA LEH..!! WQ/- Dulyar

Waxaan soo agmaray Guri gubanaya oo qoyskii lahaa,deriskii iyo dadweynihiiba ay wada daawanayaan, oo aaney jirin cid isku howleysa iney dabka damiso......YAAB Dadka guriga gubanaya lahaa oo ka mid ah dadka daawanaya ayaa midba mar hadlayaa,wuxuuna farta ku taagayaa hadba sheyga markaas gubanaya sida:- -Hada Kushiinkii baa gubanaya,......War wuxuu u tilaabay qolkii caruurta,......Aaboow ....Aabow hada waxa gubanooya Maqaasiinkii,.......daashkii ma soo dhaafay,.......Haa qolkii Jiifka ayuu dabkii u sii socdaa,......kaas waa lagu kala baxaye Guryaha kale lee amuu u gudbaa, .....Maya Maya weli gurigaan dabku ma soo dhaafin,.......midbaa dabka ku eedeynaya in Odayga reerku ka dambeeyay...Balse midkalaa ka diidaya oo leh Wiilka weyn ayaa guriga gubay.........Gabar School leey ah oo buugaag xabadka ku heysata ayaa meel halkaas ah ka leh..Adeeryaalow beenta daaya guriga Gabadha weyn baa gubtaye.......Haa dhamaan dadku sidaas ayey u wada hadlayeen....... Mana jirin cid tilaabo muuqata oo lagu bedbedaaniyo guriga gubanaya qaaday, waxaana laga hadlayey oo keliya hadba natiijada ka dhalata dabka kacay oo ahaa mid marba marka ka dambeysa ku sii faafayay qolalka guriga. Anigoo yaaban baan mid xiiqsan oo ka mid ahaa dadka guriga gubanaya daawanaya ku iri,....Sxbow aaway dadkii lahaa gurigaan gubanaya.? Nasiibdaro wuxuu faraha iigu fiiq fiiqay Oday iyo Habar iyo dhowr caruur ah, isagoo ii raaciyay in dhamaantood ay maskaxda ka xanuunsan nayaan. -Waxaan kaloo weydiiyay, hadeey sidaas tahay maxey dadka deriskooda ahi u daawanayaan guriga gubanaya oo ay qoyskaan xanuunsanaya u caawin waayeen.? Wuxuu iigu jawaabay qoyskaan dadka la dariska ah oo dhami horey ayey u naceen una dhibsadeen habdhaqankooda, waayoo 30 sano ayey isku xumeyn dhexdooda ah mar walba u gubayeen gurigooda, hadana loo dulqaadanayey oo la caawinayey, sidaas daraadeed hada weyba rabaan deriskoodu inuu gurigu ka gubto. Iyadoo ay Sheekadu halkaas ii mareyso oo aan garan la’ahay go’aanka aan ka qaadan lahaa arintaan, ayaan hurdadii ka toosay , markaas ayaan ogaaday in wuxuba ay ahaayeen Riyo maalmeed keygii caadiga ahaa, .....iga tag dheh. Maxaa yaab isdabayaal.!!!

WARBIXIN:- GURIGAN GUBANAYA YAA LEH..!! WQ/- Dulyar

Abdulkadir dulyar Friday, September 10, 2021

WARBIXIN:- CABASHADA SANDUUQDA DOORASHADA.WQ/-Dulyar

CABASHADA SANDUUQDA DOORASHADA.!! Mar hadii aaney jirin sanadkan wax cabasho ah oo ku saabsan sida magacaabista ah ee ay ilaa hada doorashadu u socoto, oo laga soo sheegayo Madaxda murashixiinta,Kuwa kuraasta doonaya,gudiyadii doorashada iyo xitaa Shacabkii wax garsoori jirey, xaalkuna yahay Dheri walba Ninka u dhow Lafta hakala baxo, ayaa warar goor dhow soo baxay waxa ay sheegayaan iney jirto hal cabasho oo aad u weyn taasoo ah CABASHADA SANAADIIQDA DOORASHADA.!!! Waxeyna leeyihiin,...Walaalayaal Annagu idiin kuguma imaan sadaqo ee UN-ka ayaa naga soo bixiyey lacago aad u farabadan oo weliba deyn ku ah dalkiina, waxaana in mudo ah dhaqaale badan iyo waqtiba laGu bixiyey in naloo tababaro shaqaalihii na isticmaali lahaa ama tirin lahaa codadka ay Xildhibaanadu dhexdeena ku ridaan, Sidoo kale markii dalka nala keenay waxaa diyaarado la kireeyay nalaku kala geeyay Gobolada ay doorashooyinku iminka ka dhacayaan,, intaas oo dedaal iyo dhaqaale ahna waxaa loo sameynayey waxey aheyd in dalkiina ay ka qabsoonto wax doorasho u eg oo lagu qancin karo kuwa dusha sare idinka heysta ee aad halkaan ugu xareysan tihiin. Hadaba , Sanadkaan waxaad sameyseen wax yaab leh, waayoo sanduuqyadii la idiin keenay badan kood meydnaan isticmaalin oo meel ayaad iska dhigteen, qaarkiina waxey subixii geeyaan goobta doorashada, duhurkiina waxey soo xareeyaan iyadoo aan la isticmaalin oo sidooda u af xiran, balse taa bedelkeeda waxaad isticmaasheen wax la yiraahdo MALXIISYO, aan u tababarneyn sida sanduuqda loogu tababaray shaqaalaha, waan ognahay waa kuwa ay daruuftu ku qasabtay oo xitaa hadalka gefgafaya ama uu AfSoomaaligu dhib ku yahay, waxey dhaqaale dartii ugu ciyaareen mustaqbalkooda iyo kan Caruurtooda, waxeyna hayaan shaqadeena Lkn iyagu isma oga, Ugu dambeyn, waxaan Reysalwasaaraha, madaxda Gobolada iyo gudiyada doorashooyinka ka codsaneynaa in MALXIISYADU shaqadeena noo daayaan oo nagu ixtiraamaan, waana in dhaqankaan si degdeg ah wax looga qabtaa inta aan Madaxweyne malxiis kiisa wata dusheena lagu dooran iyadoo aan hal sanduuq nalaka isticmaalin.!!....midna Ogaada kuwa doorashada maamulayoow, hadii ay sidaan shacabkiina iyo waxgarad kiinu idinkaga aamusaan raalina idinkaga noqdaan, inaan Annagu maalinta Aakhiro idinku markhaati furi doono inaan hal warqad oo cod ah nalaku ridin......Mahadsanidiin. WAA ARAGTIDEYDA GAABAN.!! Maxaa yaab isdabayaal.!!

WARBIXIN:- CABASHADA SANDUUQDA DOORASHADA.WQ/-Dulyar

Abdulkadir dulyar Thursday, August 12, 2021

WARBIXIN:- SOOMAALIDU WAA UMAD KHILAAFKA JECEL.! WQ/-Dulyar

WARBIXIN:- “SOOMAALIDU WAA UMAD KHILAAFKA JECEL.!! -BAL U FIIRSO,, Xornimo doonkii Soomaalidu waa isku khilaafsaneyd, dowladihii Rayidka kadaalika,oo waxaaba khilaaf lagu dilay Madaxweyne C/rishiid Cali Sharma'arke,AUN , tii ugu danbeysay ee KACAANKA waxaa lagu riday khilaaf uu Qorigu wehliyo, Bur-burkii ka dib, waxaa is khilaafay AUN Jan. Ceydiid iyo Cali Mahadi, AUN Caato iyo Caydiid , Cali Mahdi iyo Muuse Suudi, Cumar Finish & Muuse Suudi, Dowladdii Jabuuti ee 2001-dii waxaa is qabtay Madaxweyne C/qaasim iyo Reysal-Wasaarayaashiisii AUN Dr Cali Khaliif Galeyr, & Xasan Abshir, -Dowladii KMG aheyd ee 2004-tii Nairobi lagu soo dhisay, laguna soo doortay Madaxweyne, AUN C/laahi Yusuf, Dhamaanteed waxa ay waqtigeedii ku dhameysatay khilaaf,ka dib markii ay wada shaqeyn waayeen 2-dii Reysal Wasaare ee uu Odaygu soo xushay ee kala ahaa Md Cali M.Geeddi iyo AUN Md Nuur Cadde, dhanka kale , labadii dad isugu dhawaa {SH.XASAN DAAHIR IYO SH.SHARIIF,}ee Diinta ku hishiiyay 2006-diina Muqdisho ku dhisay Maxkamadihii Islaamka ayaa Khilaaf ku kala tagay oo xiligaa midba koox Jabuuti iyo Asmara la fadhiystay, inkastoo khilaafkaas uu midna Madaxweyne ku helay midna uu Xabsi guri ku galay. -2009-kii waxaa Dalka Jabuuti ,markale lagu soo dhisay Dowlad KMG ah oo uu Madaxweyne ka yahay Mudane Sh.Shariif, hase yeeshee 2 sano gudahood waxa ay Madaxweynaha is qaniineen 2 Reysal Wasaare oo kala ahaa Md Cumar C/rishiid iyo Md Farmaajo,iyadoo weliba la xasuusto in khilaafkii Farmaajo aakhirkii lagu soo xaliyay ""Kampala Accord"" waxaana la sheegaa in Md C/Wali Gaas oo ahaa Reysal Wasaarihii 3-aad oo ay wada shaqeeyeen Madaxweyne Shariif inay isla dhaceen iyagoo is khilaafsan.ka dib markii waqtigu ka idlaaday. -2012-kii,waxaa markii ugu horeysay Dalka gudihiisa lagu dhisay Dowlad aan KMG aheyn,oo ka tabar roon Dowladihii hore ee KMG ahaa,waxaana Madaxweyne loogu doortay Md Xasan Sheekh, oo la rumeysnaa in uu yahay Madaxweyne la imaan doona is badal waxna ka soo bartay hab dhaqanka khilaafka ku dhisan ee lagu soo arkay Madaxdii isaga kaga horeysay Kursiga,weliba markii la doortay wuxuu noo cadeeyay in Dowladiisu khilaafka ka fogaan doonto, hase yeeshee Sanadkii koowaadba waxaa dhankiisa ka soo yeertay Aniga iyo Reysal wasaare Saacid Sh Doon ma wada shaqeyn karno ee ha la i dhaafiyo,,Sanadkii xigayna waxaa la maqlay Khilaaf faraha laga qaad ah oo ka dhex shidan isaga iyo Reysal Wasaarihii 2-aad Md C/Wali Sheekh,markii uu hardankaa ku soo guuleystayna waxa uu soo magacaabay Md Cumar C/rishiid oo noqday Reysal Wasaarihii 3-aad oo ay wada shaqeeynayaan mudadda 4-ta Sano ah ee loo doortay Xilka Madaxweynanimo, qudhiisana iskuma wanaagsaneyn marka la eego Doorashadii 2017kii sida ay iskula macaamileen. -8 February,2017 Kii Madaxweynihii la doortay inkastoo ay Reysalwasaarihii uu magacaabay waa Kheyre ay weli isla jaanqaadayaan, hadana waxaad moodaa in ay sheekadu labadaa kursi ka soo wareegtay oo aan marna khilaaf la’aan la noqon, waayoo 2 Sano gudahood waxaa fooda isdaray Gudoomiyihii Baarlamaanka & Reysalwasaaraha waxaana khilaaf ku baxay Gudoomiye Jawaari, markale waxaa khilaaf soo ifbaxay iskaga horyimid Gudoomiyaha Baarlamaanka oo ah kii labaad & Madaxweynaha inkastoo isjiid jiid dheer ka dib si hoose loo xaliyay khilaafkaas. Sidoo kale waxaan la dafiri karin khilaafka dowlada dhexe iyo Madax Goboleedyada oo isagu noqday mid loo taag waayay oo lagu kala aamusay, sida khilaafka DANI iyo AXMED MADOOBE kala dhexeeya Dowlada dhexe, -2022-kii, waxaa marlabaad kursiga madaxtooyada ku soo laabtay MD Hassan Sheikh, oo ahaa Ninka hogaaminayay mucaardkii xiligii doorashada ka itaal roonaaday hogaamiyihii N&N, doorkaan MD Hassan waxa uu RW u soo xushay Nin ay waxbadan iska yaqaanaan oo uu isku hubo ineysan is khilaafi doonin, waa Reysalwasaare Hamza Abdi Barre, oo ah Nin ku cusub saaxadda Siyaasadeed dalka, balse 2016-dii mar ahaa hogaamiyaha doorashadii madaxtinimo ee Jubaland, aadna ugu ololeynaya in mar labaad Axmed Madoobe la doorto, xili ay doorashadaas si weyna ay uga soo horjeedeen madaxdii federaalka ee N&N, Balse sanadkii koowaad MD HSM waxa uu khilaaf koodu soo shaac baxay isaga & MD Said Dani oo ah hogaamiyaha Puntland, Madaxweyne HSM oo aan marna u dhaqaaqin inuu khilaafkaas xaliyo, iyo Dani oo ku adkeystayna waxey sababtay in ay labada Oday faryara bidix isku salaamaan, ilaa maantana khilaaf kaasi waa mid taagan. Dhanka kale, Madaxweyne HSM doorkaan marna dhib kalama kulmin, Gudoonka 2da Aqal iyo Reysalwasaarihiisa, waxwalbana waxey ilaa sanadkii 2aad ugu socdeen sidii uu qorsheeyay, balse markii la guda galay sanadkii 3aad, loona talaabay wax ka bedelka Destuurka KMG ah iyo diyaarinta doorashada Qof & Cod, ayaa waxaa ku furmay mowjado murano ah oo kaga imaanayay dhanka madaxda M/Goboleedyada qaarkood, Mar qudha ayaa iyadoo ay awelba Puntland ka maqneyneyd miiska wadahadalada, waxaa lagu baraarugay khilaaf kaloo adag oo ka yimid dhanka hogaamiyaha Jubaland ee Md Axmed Madoobe,kaasoo salka ku haya nidaamka doorashooyinka dalka, wuxuuna si adag uga soo horjeestay waxwalba oo ay horey ugu wada socdeen MD HSM, tilaabadanina waxa ay noqoneysaa maamul goboleedkii 2aad oo ay is khilaafaan MD Hassan Sheikh mudo xileedkiisa, Sida muuqata khilaafka Axmed Madoobe, waxa uu caqabad weyn ku noqon doonaa qorshihii uu mudada 3da sano ah ka soo shaqeynayay MD HSM, kuna doonayay in uu dalka kaga qabto doorasho Qof & Cod ah. CONTINUOUS……. …. -Khilaafku ma aha mid ku kooban Siyaasadda iyo doorashooyinka ee waa mid ku faafay meel kasta oo Soomaalidu degto, waxaa leysku khilaafsan yahay dilka dadka oo Alshabaab iyo Daacish midba goonidiisuu u aaminsan yahay in dilkiisu saxan yahay, mararka qaarna iyagaa isku dila maxaad hebel u dishay, Ganacsigu waa kadaalika, Culimadu iskuma wanaagsana, Dhalinyaradu waa boqol Urur, Saxaafaddii mar horaa loo taag waayay,Fanaaniinta khilaafkoodu wuxuu gaaray iney Heesaha isku soo duqeeyaan, xitaa qolyaha Naafada ah ayaa Naafanimada isku khilaafaan oo u kala baxay Il laawe, Lug laawe, iyo Gacan laawe, -Wajibook qudhiisa Soomaalida ku wada jirtaa isma jecla,mid waliba midka kaluu wax ku khilaafsan yahay,intaa BLOCK. Iyo aflagaado ayaa leysku hayaa, oo waxaaba suurtagal noqon laheyd hadii uu Facebooku lahaan lahaa meel rasaastu ka dhacdo in lagu dhex arki lahaa Soomaali badan oo isku dhex xabadeyneysa. Sidaa iyo si ka daran ayaa Dal, Gobol, Dagmo, iyo Tuulo Soomaalidu dabada isku wada heysataa , khilaaf kastana waxaa daba taagan Bur bur, wax qabad la'aan, iyo dagaal ay ku naf waayaan kumanaan rayid ah oo aan waxba galabsan. Hadaba maxaa Soomaalida Khilaafka ugu wacan? -Maxaa ka qaldan , Maxaase u diiday inay isku tanasulaan ama ay isku dulqaataan si nabad ugu wada noolaadaan.? ..... WAA SOCOTAA.............. FG.TANI WAA ARAGTIDEYDA. Clqaadir M. Faarax [ Dulyar} dulyar23@Gmail.com

WARBIXIN:- SOOMAALIDU WAA UMAD KHILAAFKA JECEL.! WQ/-Dulyar

Abdulkadir dulyar Monday, August 9, 2021

WARBIXIN:- WAR JIRAA CAKAARUU IMAAN.!!WQ/-Dulyar

Wadahadalka Rooble & Uhuru oo sida la sheego ka soo bilowday Djibouti, mararka qaarna ku qabsoomayey dhanka ☎️, ilaa uu ka soo gaaray Kulan qarsoodiya ee ay xamxamtu sheegeyso iney dhawaan labada dhinac ku wada yeesheen Shirkii Waxbarashada ee London, waxa keliya oo ay dadku ka xasuustaan waa kulankii uu MD Uhuru qorsheeyay in uu ka dhaco Nairobi oo uu RW Rooble ka cudur daartay., Sheekada 🇸🇴 iyo 🇰🇪 , oo aheyd 3dii sano ee la soo dhaafay mid aad u xasaasiya oo dhowr jeer xiisado Siyaasadeed ka kicisay gudaha Soomaaliya, sidoo kale cid kasta oo ka mid ah Madaxda Dowlada Soomaaliya ama Siyaasiyiinta mucaaraka ah ee lagu xanto ama lagu arko iney Kenya gacan saar la leeyihiin waxey ahaayeen kuwa markiiba shacabka kala kulmayay mucaarado xoogan, balse RW Rooble maadaama uu yahay shaqsi ku cusub Siyaasadda Soomaaliya oo loo igmaday doorashada 2021-da oo keliya, dad badanina kama filayaan inuu noqonayo albaabka keliya ee maanta Kenya uga furan Soomaaliya, maadaama dhamaan albaabadii kale oo dhan ay ku soo guuldareysatay. Balse hada waxaa soo if baxaya madmadow iyo shaki ku saabsan waxa ay salka ku hayaan kulamada iyo xiriirka joogtada ah ee u dhexeeya Rooble & Uhuru, inkastoo Warar dhawaan soo baxay ay sheegayaan in maalinta Axada ah ay Muqdisho ku soo wajahan tahay W/Arimaha Dibadda ee Kenya 🇰🇪, si ay kulan ula qaadato dhigeeda Somalia 🇸🇴, ka dibna ay labada dhinac qalinka ku wada duugaan waxyaabihii ka soo baxay heshiiskii hordhaca ahaa ee ay Uhuru iyo Rooble ku wada gaareen M/London, sida caadiga ahna waxaa Saxaafadda loo soo bandhigi doonaa kulanka ka dib qodobada diplomacy ahaan loo yaqaano marin habaabinta indhaha bulshada. Dhanka kale, wadahadalkan cusub ee Somalia 🇸🇴 iyo Kenya 🇰🇪 u bilowday ma aha mid si fudud ku yimid ee waa mid ay ka shaqeeyeen dalal dhowr ah oo ay hormuud u yihiin Norway,Qatar ,UK, & dabcan African Union {AU-da}, oo iyagu Todobaadkii hore Dowlada Soomaaliya ku cadaadinayey iney aqbasho codsiga ay Dowlada kenya soo gudbisatay ee ah in la dhexdhexaadiyo khilaafka xuduudaha ee kala dhexeeya Soomaaliya, inkastoo W/Arimaha Dibadda ee Soomaaliya uu beeniyey in ay DFS wadahadal kala yeelaneyso muranka Xuduudaha dhigooda Kenya, maadaama ay arinta xiduudda soo hoos galeyso xadka muran badeedkii ay Kenya gelisay soohdinta baddeena, oo ah mid horey dacwadeeda loogu gudbiyay Maxkamada caalamiga ah ICJ, dhawaana laga sugayo go’aanka ay Maxkamaddu ka soo saarto Dacwaddaas. Sikastaba, hadeey dhacdo in maalinta Axada ah ay Muqdisho ku wada kulmaan labada Wasiir Arima dibadeed ee Somalia & Kenya, iyo in markaa ka dib uu RW Rooble Talaadada safar ku tago Kenya, waa in calaamad su’aal la wada saaraa dhamaan is aragyadii iyo xiriiradii horey u dhexmaray MD Uhuru iyo RW Rooble.kuwaas oo aan faahfaahino dheeriya laga bixin, balse inta ka horeysa waxaan leenahay WAR JIRAA CAKAARUU IMAAN.!! Maxaa yaab isdabayaal.

WARBIXIN:- WAR JIRAA CAKAARUU IMAAN.!!WQ/-Dulyar

Abdulkadir dulyar Saturday, August 7, 2021

WARBIXIN:- SOOMAALIDU MA XUR BAA.?? WQ/-Dulyar

=SOOMAALIDU MA XUR BAA.?? Dabaaldega 01-da Luulyo 1960-kii oo ku asteysan markii uu Gumeystihii Talyaanigu ka harsan waayay Geesiyaashii Gobonimo doonka ahaa ee Gobolada Koonfureed uu ku yiri xornimadiina qaata, sidoo kalena xambaarsan midowgii labada daraf ee Waqooyi & Koonfurta Soomaaliya, islamarkaana ay dadka Soomaaliyeed meel walboo ay joogaan ay sanad walba maalintaas oo qudha soo xasuustaan una dhigaan xaflado waaweyn iyaga oo korkooda iyo dharkooda ku soo xardha Calanka buluuga ah, goobtana ku soo bandhiga khudbado taariikhihii hore ah oo waan xorownay iyo dhiig baa u daatay u badan iyo heeso loo qaaday waagaas xoriyadda, Dabadeedna saqda dhexe inta Calanka la saaro oo xabado dheemash ah kor loo rido ayaa lagu kala dareeraa goobta, balantuna waa sanadka dambe iyo inta nolol ku gaarta. Iyadoo Inta ka horeysana uu Qof walba huwado Calan xaafadeed kiisa , waana mid ka mid ah qorshayaasha uu gumeystaha cusubi u dejiyey in lagu kala qeybiyo Soomaalida awoodeeda iyo Calankii buluuga ah ee ay xoriyaddooda ka dib ku midoobeen. . Waa sax Xoriyadda aan maanta ku faaneyno dad baa u shahiiday una soo silcay, Waase dabeecad lala qabsaday ilaa 60-kii in si isku mid ah sanad walba loo maamuuso 26-Juun iyo 01-da Luulyo, iyadoo aan marna leys weydiin ileyn waqtiga iyo duniduba meel qudha ma taagnee maxaa isbedalay iyo halkee maanta ku sugan nahay.? -Labadii daraf ee shalay midoobay maanta xagee kala joogaan.? -Yaa mar labaad kala qeybiyay oo kala masruufa oo sii kala fogeynaya? -Goboladii Koonfureed yaa 10-ka Calan ka taagay? -Yaa Soomaalida ka hortaagan in 30 sano ay yeelato dowlad macno leh? -Ma dad iyo dal xor ah baan nahay? -Dowladdii aynaan dooran markii gacmaheena lagu dumiyay kadib, dowladihii dalku yeeshay ma Soomaali baa dhisatay mise waa leynoo soo dhisay? -Federaalkan nalaku kala qobqobay ee 10 ka Madaxweyne dhalay ma inagaa dooranay waa MAYA .marka ma xor baan nahay? -Dastuurka dalka ma Soomaali baa qoratay mise waa loo qoray? -Soomaaliya iney Ciidamo awood leh dhisato, tababarato, oo maamulato, Go’aankooda ma Xor bey u tahay? WAA MAYA.!! -Madaxweynaha, Xukuumadda & Baarlamaankeenu ma xor baa sow dad la biilo maaha oo go’aanadooda iyo fikirkoodaba lala wadaago? -inkabadan 40-dal Ciidamadooda ayaa dalka jooga ma Soomaalidaa lagala tashaday waa MAYA, ma xor baan nahay? -Ilihii dhaqaalaha ee dalkeena ayaa naloo maamulaaye ma xor baan nahay? -Alshabaab & Alqaacido yaa dalkeena ku abuuray? - Iminka Ragaa isku daalnaye iney Soomaalidu wada taageerto, ama hishiis dhab ah la gaarto ama xoog isaga saarto ma xor bay u tahay? WAA MAYA, - Go’aan dhab ah ma ka qaadan kartaa dowladdeenu waa MAYA ma Xor baan nahay marka? *Intaas & inkaloo qarsoon oo gumeysi ah baan maanta ku jirnaa balse waxaa xaqiiq ah in uusan maanta dalkeena ka jirin Gumeysi na adoonsanaya oo la mid ah kuwii ay awoowayaasheen iska dulqaadeen ee awooda qoriga ku dhisnaa ee Talyaaniga , Engriiska,& Faransiiska, waayoo noocaas hada waa laga ilbaxay waxaana 30-kii sano ee la soo dhaafay iyo 30 kaleba ku sii socon doonaa wadadii uu noo jeexay Gumeysi maskaxeedka casriga ah oo aynaan ka leexan karin maadaama uu ku xidideystay meelihii muhiimka u ahaa In dalka iyo dadku ay ka xoroobaan sida:- •Gumeysi Dhaqaale (Economic Colony) •Gumeysi Siyaasadeed, ( Political Economic) •Gumeysi dhaqan, (Cultural Colonies) •Gumeysi Maskaxeed, ( Colonization of the brain) •Gumeysi Horumareed, ( Colonization developments) •Gumeysi nololeed ( Life Colonies) •Gumeysi Amni , ( Colonial Security) iyo halbowlayaal kale oo nalaka gumeysto balse aynaan badankeenu fahamsaneyn. GABAGABO:- Soomaali hadaan nahay waa inaan su’aalo badan iska weydiinaa faa’do iyo khasaaro wixii aan ka dhaxalnay Xoriyadda 61-da sano jirsatay ee aynu sanad walba u dabaaldegno, & sida aan mar labaad uga xoroobi laheyn Gumeysi maskaxeedka casriga ah ee nalookugu bedalay kii Adoonsiga ee qoriga ku dhisnaa welina nalaku heysto .!!! =HADII KALE WAXAAD MAANTA BI’ISAAN,BIRI HA U SHALAAYINA.= Mahadsanidiin/- WAA ARAGTIDEYDA:- Maxaa yaab isdabayaal.!!

WARBIXIN:- SOOMAALIDU MA XUR BAA.?? WQ/-Dulyar

Abdulkadir dulyar Saturday, June 26, 2021

WARBIXIN:- DAMACA DHALINYARADU WUXUU KU DHAMAADAA MADAXTOOYADA.!! WQ/- Dulyar

DAMACA DHALINYARADU, MAANTA WUXUU KU DHAMAADAA MADAXTOOYADA.!!! Shalay markii uu dalku burburay Odayaashii qabaa’ilka iyo dhalinyaradii waxey soo ag dhoobteen Hogaamiye Kooxeedyadii dalrka, wey u dagaalamayeen, wey waardiyeyn jireen,waxaana loo dirsan jiray shaqo walba, marka laga reebo bariis jaay ah iyo majimo qaad ah mooyee majirin wax kaloo xuquuq ah oo ay dhalinyaradu ku laheyd ragaa ilaahey u qasbay iney awoodooda isticmaalaan,kii dhinta, kii dhaacma iyo kii ku cuuryaamana horaa looga socon jiray, balse mararka qaar dhalinyarada waxaa ku jirtay armaa Hogaamiye kooxeedkiinu dalka madax ka noqdaa sidaana uu meel dhaanta meeshaan idiin geeyaa. Rajadaas ay dhalinyarada qaarkood naftooda iyo waqtigooda ugu hurayeen Nin hogaamiye ah oo isagu dushooda ku gorgortamaya, maalinba meel bey soo taagneyd, mararka qaar waxaaba dhici jirtay in dhalinyaradu hogaamiye kooxeedka dartiis ay dakano uga gasho dhalinyaro kale, misna iyagoo dakanadaas qaba ayuu hogaamiyuhu isagoo aan dhalinyarada ka talo gelin wuxuu heshiis la gaari jirey hogaamiye kale oo ay in mudo ah iska soo horjeedeen, Waa taariikh dheer iyo dhacdooyin aan u soo joogay oo hadaan is iraahdo ka sheekee u baahan in lagu qoro baalal badan,balse 30 sano waxaa maanta ii muuqata saasaantii oo kale, Dhamaan dhalinyaradu halka ay maanta wada tiigsanayaan waa Madaxtooyada, waxeyna arkeen dhalinyaradii kaga horeysay sida ay u noolaayeen mudada uu xilka Madaxweynanimo ama Reysalwasaare hayay Ninkii ay la soo ololeeyeen markii uu xildoonka ahaa, wey jiraan dhalinyaro badan oo damacoodii ku hungoobay ka dib markii uu soo bixi waayay Ninkii ay mudada sanadka ah u ololeynayeen kulana joogeen shaxaad iyo bariis, maadaama aaney wax heshiis la galin oo isaga iyo iyaguba iskula howlgalayeen rajo iyo mustqbal, waa suurtagal in dhalinyaro badan oo Nin xil doon ah dartii u dakanoobay ama ula kala dhintay dadkale in marka Ninka ay wateen guuldareysto uu cidla kaga dhaqaaqay, Hada waxaa la joogaa waqtigii ay 4 tii sanaba mar Musharixiinta xilka ugu sareeya dalka ku haminaya ay isi soo xaadirin jireen, waxey isugu jiraan wajiyaal la yaqaan iyo kuwa dadka ku cusub oo soo naq raacay, mid walbana waxa uu howlgeliyey ugu yaraan boqol dhalinyaro ah, isaga oo koox walba howl gaar ah u xilsaartay , saacadaha shaqadoodu ma xadidna, wax heshiis ah oo la wada galaana ma jiro, Dhalinyaradu Af iyo adinba Ninkaa waa u dagaalamayaan {Social Media} , waxaa la qurxinayaa sawiradiisa iyo muuqaaladiisa, isagu si uu isaga dhigo Nin balaayo ka dhacday wuxuu leeyahay I daba orda, marka uu guriga ku caajiso wuxuu mar gurigiisa ugu tagayaa musharax kale,mar wuxuu booqdaa Ugaaskiisa, mar wuxuu shirar isdabajoog ah la yeeshaa Odayaal,Dhalinyaro,Haween, iyo qeyb kasta oo bulshada ah, marna wuxuu balan ka soo qabsadaa mid ka mid ah Safiirada baagamuundada ah ee Xalane dhooban, intaana dhalinyaradu waa shaqeyneysaa si ay u gaaraan hadafkooda oo ah iney bedelaan dhalinyarada sidooda oo kale 4 sano ka hor la soo jabhadeeyay Madaxweynaha hada fadhiya Madaxtooyada kuwaas oo lagu abaalmariyey xilal iyo mansabyo kale,waxey dhalinyaradu ujeedaan gawaaridooda iyo xafiisyadooda qurqurxoon,safaradooda iyo sida ay u nool yihiin, Musharaxuna waxa uu har iyo habeen isla maqiiqayaa waa inuu mar un Madaxtooyada tago oo Madaxweyne la yiraahdo, waana labada rajo ee lagu wada socdo. Halkaas markeey taagan tahay, dhaliyaradii shalay iyo kuwa maanta waxba kuma kala duwana, waxeyna gebigood noqdeen kuwa ku shaqeeya Rajo iyo armaa hogaamiyahaagu wax noqdaa, waana nasiibdaro weyn oo ku dhacday dhalinyaradii laga sugayay iney iyagu dalka iyo dadka u noqdaan cudud iyo caqli. !! WQ/- Abdulkadir Dulyar Maxaa yaab isdabayaal

WARBIXIN:- DAMACA DHALINYARADU WUXUU KU DHAMAADAA MADAXTOOYADA.!! WQ/- Dulyar

Abdulkadir dulyar Sunday, June 20, 2021

WARBIXIN:- YAABAYE MA YAABTEEN.!! WQ/-Dulyar

WARBIXIN:- YAABAYE MA YAABTEEN.!! Hal mid waan xaqiiqsaday in waagii hore ay waalidiintu caruurtooda ka adkaayeen, xumaantana aysan hortooda ku sameyn karin, Caruurtuna ay waalidiintood ka baqan jireen, islamarkaana ay ixtiraami jireen, waalidka ka sokowna ay gabar waliba ama Wiil walba uu ka baqan jirtay Wiilasha iyada la dhashay, kuwa la qaraabada ah,& xitaa kuwa dariska la ah, dadkuna ay ahaayeen dad xalaal quudato ah oo isjecel, si guudna isku qadarin jiray, inkastoo dunidu sidaan aysan casri u aheyn oo aan la aqoon waxa maanta la yaqaano,oo aan loo wada nooleyn sida maanta loo nool yahay, oo xumaantu u muuqan sida ay maanta u muuqato, oo aan loo bahaloobin sida maanta loo bahaloobay. Balse maanta waxaa muuqata in waalidiintu aaney caruurtooda ka adkeyn, xumaantana ka celin karin oo ay hortooda ku sameynayaan, waagii hore Wiilashaa qaarkood faroojo noqon jireen lkn hada Wiilashu waa i qarso Gabdhihii baa banaanka iskeenay, malaha caruurtu waxey waalidiinta ugu booteeyaan, hadaan waxaan rabo ley fasaxin Wlhy waa isqarxinaa ama waa tahriibaa oo baddaan galaa, MOOYI, markaasaa waalidkiiba caruurta ka cabsanayaa oo uusan waxba ka oran karin xumaan kasta oo ay Wiilashooda ama Gabdhahoodu hortooda ku sameynayaan, YAAB.. Waayoo sidaani macquul maaha iyo in waalidiintu wax ka ogaan waayaan, Wiilasha kama hadlayo kuwa wax la qasanaya,ee waa ka hadlayaa Wiilasha macquulka ah ee Gabdhaha la dhashay iney iyaguna wax ka ogaan waayaan waxaan sida public ah uga dhex socda Social Media, Wlhy aakhiro dhamaantiin waxbaa leydinka weydiinayaa. Nasiibdaro culumadeenii halkii ay umada wanaaga fari lahaayeen xumaantana ka reebi lahaayeen waxey ku mashquulsan yihiin siyaasad iyo shirar beeleedyo, qaarkoodna waa iska aamuseen, lkn iyagana masuuliyaddaas maalinta Aakhiro waa la weydiinayaa ee ha ogaadaan waaba ogyihiine. One Example: waxaa dhacday xaafadeena, gabar iyo Wiil dhalinyaro ah oo jaceyl isku guursaday ayaa in mudo ah TIKTAK & INSTAGRAM kooda soo dhigayay muuqaalo romantic ah oo ay ku muujinayeen iney noloshooda ku qabacsan yihiin, waxey wada isticmaalayeen hal cinwaan,halkaas waxaa ku jira muuqaalo aad isleedahay labadaan qof marna xisaabta kuma darsan in biri calaf kala wadi karo,in sheydaan isku diri karo ama wedku kala kaxeyn karo, waxey u dhaqmeen sidii lamaane hal Ticket oo GO ah ujartay nolosha, lkn waxaa dhacday mudo ka dib in labadii ruux kala tageen,cinwaankiina waxa uu u haray Wiilkii oo Password kii la wareegay, Gabdhii oo labo caruura heysata ayaa misna waxey guursatay Nin kale oo dhalinyaro ah oo aan isna aan muudkiisa xakameyn karin, balse durba waxey isku khilaafeen gabadhii muuqaaladii si walba loo sameeyay ee INSTAGRAM ka dhexyaala qof walbana uu inta soo degsaday wareejinayo Social Media, qof damiir leh ma aha wax uu u adkeysan karo in xaaskiisa Ninkii ay kala tageen oo si walba ku sameynaya in maalin walba uu baraha ku dhex arko, Gabadhii oo xoogaa caqliyeysatay xitaa wey dareentay qaladkaas iyo xanuunka uu ku hayo, Ninkeedii hore oo malaha ka xun guurkeeda dambe isna waa Wiil yar oo aan waxbadan kala xeerin karin, malaha si ku talagal ah ayuu muuqaaladoodii hore ugu faafinayaa Gabdha iyo Ninkan dambee guursaday saaxiibadooda. aakhirkii Mar labaad ayaa gabadhii gurigeedu wuxuu ku dumay muuqaaladii ay Ninkeedii hore wada duubeen iyadoo aan sida ay hada wax u fahamsan tahay aan u fahamsaneyn. bal eeg gabadhaa yar sida uu mustaqbalkeedu qalqalka u galay, dabcan keligeedna maaha ee beertaa lagu wada jiraa, oo gabdhuhu sida muuqata Wiilasha qaba iyagaa ku soo riixaya iney muuqaalo Romantic ah wada duubaan dabadeedna public laga dhigo,malaha hal ujeedado ayey ka leeyihiin waa iney Shaabad ku dhejiyaan Nimankooda si aan loogu qaldamin, lkn waxeysan fahamsaneyn saameynta dambe oo ay noloshooda ku yeelan doonaan muuqaalada isu talax taga ahi. Ugu dambeyn, waxaan talo ahaan ugu soojeedinayaa,da’yarta isticmaasha Social Media iney aaladaan u isticmaalaan si taxadar leh, gaar ahaan Gabdhaha aad moodo iney jirkooda iyo dharka xeyeysiiyaan waxaan oran lahaa Ilaaheey ka baqa, ogaadana muuqaaladaani iney hadaad dhimataan xitaa ay ku harayaan baraha bulshada, ilaaheeyna idinkula xisaabtami doono, sidoo kalena mustaqbal kiina mololeed xiraa aaney u wanaagsaneyn oo aan laga yaabin Nin diin iyo sharaf rabaahi inuu gabar meel walba isqalqaloocineysa inuu soo haweysto, Tankale kuwa leh LAMAANE GUULEYSTAY ee iyaguna noloshooda ku qamaaraya arinkaas waan uga digayaa, waxaana u soojeedin lahaa iney sikale oo asluubeysan u soo bandhigaan jaceylkooda. Maxaa yaab isdabayaal div class="separator" style="clear: both;">

WARBIXIN:- YAABAYE MA YAABTEEN.!! WQ/-Dulyar

Abdulkadir dulyar Saturday, June 19, 2021

WARBIXIN:- FARQIGA U DHEXEEYA MAALMAHA COLAADDA & NABADDA.!! WQ/-Dulyar

FAALLO:-WAQTIGA COLAADDA, AABAYAASHU WAXEY AASAAN WIILASHOODA, WAQTIGA NABADDANA, WIILASHU WAXEY AASAAN AABAYAASHOOD.!!! QALINKII:- ABDUKADIR DULYAR. Waa murti aan horey loo aqoon amaba aan jirin, waqtigii aan bilaabeynay dagaalada iyo fowdada,ama buula xuuftada iyo bowdya qaawiska, balse waaya aragnimo laga dhaxlay dabadeed la bartay, bal si loogu baadi goobo xasiloonidii aan waa hore xargaha u jarnay, waana jumlad macna weyn xambaarsan oo anfac u leh sida Soomaalida oo kale dadyowga ay colaaduhu ku raageen,loona baahan yahay in kalmadahani ay u noqdaan halku dhigyo ay ku baadi goobaan nabadda, Bari samaadkii Soomaaliya inkastoo wadka loo simanaa,hadana waxaa la maqli jiray geeri da’ gaartay, sida Awoowe iyo Ayeeyo miyi ama tuulo ku go’ay,oo ay talo wada jir ah ku aaseen Casabadoodu,ama Aabe iyo Hooyo iyo waalid kaloo kadiso iyo xanuun yar dabadii ku geeriyooda xaafad si weyn looga wada yaqaan oo maalmo loo murugoodo,waxa ayna dariska iyo xigtadu ahaayeen kuwa si dhab ah isku garab taaga qoyska geeridu gashay,loomana kala hari jirin aaska iyo qurbaankaba,waxaana si weyn uga dhex muuqan jiray halkaa ubadka ay ka tageen intooda tabar galka ah,mana daboolayo in sidoo kale da’yartana uu mowdku ka adeegi jiray,waase laga saameyn badnaa xiligaa, Dhanka kale,waa marag ma doonto in waqtiyadii dagaalada sokeeye ay ka socdeen dalkeena, jiilka sida weyn ugu hoobtay ay ahaayeen wiilasha,welina ay yihiin, Aabayaashuna ay u taagnaayeen hadiiba ay haleelaan sida ey u aasan lahaayeen,iyadoo ay u dheer tahay in wiilashoodu ay u dagaalamayaan Qabiil, Hogaamiye, ama koox aan fasax ka heysan Aabaha dhalay, mar hadii ay Aabayaasha gacantooda ka baxday awoodii ay ku xukumi jireen caruurtoodana, waxa ay sanadihii la soo dhaafay ahaayeen kuwa u toog hayay shar iyo kheyrba waxii ka soo yeera dhanka wiilashooda, Waxaan ahay Aabe ku waayay dagaaladii sokeeye 6 wiil oo qaangaar ah, 7 sano gudahood ayaana mid waliba maalin gaara la ii soo sheegay geeridiisa,ma jirin mid xanuun iyo dharag u dhintay ee waxa ay sababsadeen rasaas ka soo dhacday wiilal kale oo ka soo horjeeda, 4 ka mid ah gacanteydaan ku aasay balse 2-da kale waxa ay ku go,een meel iga fog iyagoo dagaal ku jira,nasiibna uma aanan yeelan hadaan nolosha ku waayay inaan wax ka aaso meydkooda,sidaa waxaa si qunyar iigu sheegay Aabe ay colaaduhu garbaha ka rifeen,waana tan igu dhalisay inaan qoro sheekadaan, Ma aha Aabahaa oo qura ee waxaa jira Aabayaal badan oo waqtiyada colaaduhu socdaan soo aasay ama aasi doona wiilashooda,hadii aan la joojin dirirta, weyna dhacday marar badan in Aabe gaari gacan loogu keenay meydka wiil uu dhalay oo xubno ka maqan yihiin,marka uu xaqiiqsaday geeridiisana loo raaciyay in intii kale uu madfac la tagay, kuwaa maqal mooyee aan nasiib u yeelan Raq iyo Ruux halkii ay ku danbeeyeen wiilashooda,laguna soo wargaliyay in ay dad ugu war danbeysay markii ciidankii ay la socdeen ay ku soo jabeen dagaalkii ay ku jireen,kuwa kalaa qarsan jiray walwalka ay qabaan, marka uu guriga ugu yimaado wiilkooda oo qori garaarsan, maadaama aaneey ka dhigi karina, taa badalkeeda ula dhaqmi jiray sida ruux caadiya,iyaga maanka ku haya in mar ay ahaataba lagu dili doono ama uu wax ku dili doono, Laguma soo koobi karo qalin, calool xumadda colaaduhu badaan waalidiinta,bal u fiirso maxaan u soo joognay Aabe si nabada caruurtiisa kula hurda oo madfac lagu miray, dabadeedna natiijada lagu waabariistay ay noqotay in uu halkaa ku waayo nus darsin caruura iyo hooyadood,saacado dabadeedna xabaalo qura ku aasay, iyadoo aaney jirin damqasho la mid ah tii hore oo uu ka helay dariskiisa iyo xigtadiisa, Waan ogahay in Hooyada Soomaaliyeed iyana dhankeeda ay dagaalada dalka ka soconayay ku weyday Curadkeeda iyo yaraankeedaba,kuwa badana ay si wadara u aaseen ubadkeeda,bale waxaan garowsaday in aan murugadooda loo cabiri Karin qalin sida Aabaha oo kale oo ay ka dareen fog yihiin,si taa la mid ah lama xaqiri karo in Gabdha badan ay ku waayeen naftooda wixii dalka ka socday iyagoo aan dagaalameen, ama loo waxyeeleeyay dumarnimadooda, Hadaanse u soo laabtu dulucda qoraalkeyga oo aheyd Aabaha iyo wiilka uu dhalay sida ay geerida isku kaalmeeyaan waqtiyada lagu guda jiro nabadda iyo colaadaha,soona qaadanaya murtidii aheyd, {WAQTIGA COLAADA AABAYAASHU WAXA AY AASAAN WIILASHOODA,WAQTIGA NABADANA WIILASHU WAXAY AASAAN AABAYAASHOOD} oo ah xikmad mug weyn, waxaan Soomaalida oran lahaa nagu filan wixii la soo maray, aan u gudubno marxalad kale oo ka duwan xirfadihii dagaalada, lana soo baxno xafiiltan dhab ah si aan uga daba tagno bulshada asaageen ah ee cirka kala xadeysanaya,waana hubanti hadii aan u soo wada jeesano ka shaqeynta nabadda, in aan wadadaa cagta saari karno, bulshadeenuna ay gaari doonto hurumar iyo barwaaqo,dabadeedna ay Aabayaasha Soomaaliyeed marka ay ajashoodu timaado rajeyn doonaan in ay wiilashoodu si maamuus leh u aasaan,halkii ay xiliyadda colaadaha u taagnaayeen aasidda Wiilashooda, = DH A M A A D= C\qaadir Max’ed Faarax, [dulyar] dulyar23@Gmail.com Muqdisho\Soomaaliya

WARBIXIN:- FARQIGA U DHEXEEYA MAALMAHA COLAADDA & NABADDA.!! WQ/-Dulyar

Abdulkadir dulyar

WARBIXIN:- QALIN IJAARAN.!! WQ/- Dulyar

WARBIXIN:- QALIN IJAARAN.!!! Horta waa sax oo waa la joogaa waqtigii naloo sheegi jirey in 4-tii sanaba mar uu dalku galayo doorashooyin, balse ma aha waqtigii ay shacabku wax dooran lahaayeen oo taa weli lama gaarin, lamana oga waqtiga la gaari doono, maadaama aynaan Soomaali ahaan keligeen u madax banaaneyn doorashooyin keena oo ay gacmo kale nala maamulaan, doorkaana doorashadeenu waa hoogto iyo halkeedii, waa xiligii laaluushka, boobka iyo musuq maasuqa, waana xiliyada ay xil doonada iyo kuraas raadiyayaashu aad u jecel yihiin in loo sameeyo muuqaalo iyo sawiro qurxoon, laguna sifeeyo iney yihiin kuwa Halyeeyo ah oo leh karti,Aqoon,iyo waxqabad , balse ay aad u neceb yihiin in dhaliilahooda la soo faag faago oo la soo bandhigo. Sida aan la wada soconana Siyaasiyiinta wada ordeysa maadaama aaney waxqabad lagu dooran karo bulshada la hor imaan karin, waxey taa bedelkeeda iyagoo adeegsanaya dhaqaale kireystaan maalmahaan oo kale Warbaahinta iyo shaqsiyaadka ay u arkaan iney Social Media qalinkooda ugu hiilin karaan kana soo qori karaan qoraalo iyaga ka farxiya, waana waqtiyada ay ku waashaan Lebiska, xafladaha,dhexgalka bulshada, dhoola cadeynta, dhagax dhigga mashaariicyada, iyo booqashooyinka dadka taagta daran, aad ayeyna u jecel yihiin iney arkaan dad iyaga u caleema ruxaya, ama soo dhaweyn tooda darteed safaf dhaadheer ugu jira, si ay igu sawirtooda uga indho buuxsadaan. , Dhanka kale, maalmaha uu ololaha xildoonku socdo waa ayaamaha uu ruuxa xilka doonayaa noqdo qof uusan aheyn dabeecad ahaan,Aqoon ahaan, naxariis ahaan, karti iyo waxqabad ahaanba, oo waxaad moodaa iney aaminsan yihiin, “xilka ama kursiga been baa lagu soo xero geliyaa,runtana waa lagu dhaqaa,” Waayoo hadii ay xil doonayaashu qowlkooda ka rumeyn lahaayeen Adeer 20 kii sano ee la soo dhaafay ayey dadkeena iyo dalkeena ka muuqan laheyd. Waa run waa waqtiyada ay xildoonayaashu u baahdaan Warbaahinta nooc kasta oo ay tahay iyo madbacadaha wax daabaca, si loogu sameeyo muuqaalo iyo amaan ka badbadis ah oo aaney muteysan iyo sawiro qurxoon oo lagu xardho erayo wan wanaagsan oo aaney midna ka run sheegi doonin, Sidaas daraadeed Anigu warbaahin aan la hadlo iima muuqatee, waxaan la hadlayaa shaqsiyaadka Social Media uga ololeeya xildoonayaasha nooceey doonaan ha ahaadaane waxaana kula talinayaa hal qodob oo keliya:- - Saaxiibayaal ka fogaada idinkoo xildoone lacag idin siiyay amaanaya inaad xildoone kale ku xadgudubtaan ama aad wax u dhintaan sumcaddiisa, hana noqonina QALIN IJAARAN.!!! Maxaa yaab isdabayaal.!!!

WARBIXIN:- QALIN IJAARAN.!! WQ/- Dulyar

Abdulkadir dulyar Friday, June 18, 2021

WARBIXIN:- ISKU MAQAN.!! WQ/- Dulyar

WARBIXIN- ISKU MAQAN.!! Waxaa wax la hubo ah, in qofkasta ama bini’aadamkuba ay jirkiisa ku jiraan Unugyo u diyaar ah difaaciisa, waa Unugyo u dhisan sida qaabka Ciidamada oo ay u dhameystiran yihiin qalabkooda iyo hubkii ay kaga hortagi lahaayeen waxyaabaha jidhka soo weerara sida Virus-ka,ama Bacteria-da IWM.hadiise ay qofka Unugyada difaaca jirkiisu seexdaan ama ay shaqadooda gabaan waxaan shaki ku jirin iney qofkaas si fudud u soo weerarayaan cudurada waaweyn iyo kuwa yaryarba marka dambena uu u geeriyoonayo,sidaas daraadeed qofkaasi sax maaha in uu ku doodo muxuu cudur hebel ii soo weerarayaa isagoo ogsoon in Unugyadii difaaca jirkiisu ay baaba’een.!! Tusaalahaas kooban kadib, horta Soomaalidu markii ay iyadu iska burburisay Unugyadii ka difaaci jiray cadowgeeda waaweyn & kuwa yaryarba, waxey beylah unoqotay Inay si fudud u soo haweystaan dalalka deriskeeda ah iyo kuwa saaxiibka la ahaaba,sidaas daraadeed waa nasiibdaro in maanta dad badan oo innaga naga mid ihi iney ku doodayaan, Soomaaliya waxaa faragelin ku haya dalal shisheeye oo ka hortaagan iney dowlad xoog leh hesho ama ay nabadi ka dhalato, waa run arinkaa oo lama dafiri karo, waayoo intaad isku maqneyd ayaa adigana lagugu maqnaa, balse mid ogow “dunida waa lakala baqaaye laguma kala xishoodo” weligeedna waa leys riixriixayay oo hadba ciddii ujabtaa ugu liidatay. Sidaas daraadeed, eedaha aan had iyo goor ujeedinayno dalalka shisheeye waa eedo madax geed la dhac ah oo aaney jirin cid naxariis noogu sameyneyso, ee aan marka hore taa badelkeeda annagu rumeysano Soomaali hadaan nahay in aan eeddaas oo dhan leenahay,islamarkaana aan annagu ka masuul nahay waxa dadkeena & dalkeena ku dhacaya , maadaama aan annagu horay isaga burburinay wax walba oo difaac ah oo aan heysanay, welina aan annagu iska hortaagan nahay inaan dib u soo ceshano wixii naga difaaci lahaa cadowgeena iyo faragalinta shisheeye, oo ay ugu horeyso Soomaalinimadu, halkii aan u kala tartami laheyn qabyaalad,kala tag & kala qeyb-qeybsanaan. Markaan intaas wada rumeysano ayaan wada raadin karnaa xalka & mushkiladaha maanta dalkeena iyo dadkeena heysta, hadii kale inta ka horeysa waxaan ku jireynaa Waawareey Dhulkii baa nalaka qaatay, iyo Waawareey Baddii baa la boobayaa, .....Marka xigtana hadaan leys daba qaban waxaa imaan doonta Waawareey dadkii baa la iibsanayaa ama inaan aragno Qabiilo dhan oo Soomaaliyeed oo iyaga & dhulkoodiiba ay ku biirayaan dalal kale, Ilaaheey taa nama tusee....Maxaa Yaab isdabayaal.!! WAXAAD MAANTA BI’SAAN, BIRI HA U SHALAAYINA.!!! WQ/- Abdulkadir Dulyar Muqdisho

WARBIXIN:- ISKU MAQAN.!! WQ/- Dulyar

Abdulkadir dulyar Friday, June 11, 2021

WARBIXIN:- FARI TOG DHEER BEY KULA XUSHAA..!!

WARBIXIN:- ILEYN FARI TOG DHEER BEY KUGU SOO FARUURTAA...!! Ex Taliyihii Ciidanka Booliska G/Banaadir Saadaq Joon tan iyo markii uu 12-kii April isaga oo wata ciidamo taabacsan kana soo horjeeda mudo kororsigii ay Baarlamaanku maalntaa u fadhiyeen iney Xukuumadda u sameeyaan, uu meel fagaare ah kaga dhawaaqay in aan la aqbali Karin mudo kororsi sharci daro ah, kana horyimid dowladii uu ka tirsanaa islamarkaana uu fadhiisin ka sameystay xaafadda Shiirkole, waxaa la oran karaa waxa uu faraj u furay Siyaasiyiin mucaarad ahaa oo mudo sanad ah sideey u hadlayeen oo u hadlayeen intey hadalkii ku daaleen mararka qaar u holanayey iney gacan qaad sameeyaan, ka dib markii ay waayeen cid ka hoos qaada tabashadooda iyo dareen koodaba, hortiisna cidiyaha ku dirirayey iskuna aruursaday dhismayaasha ku teedsan agagaarka garoonka Adan Cadde. Kuwaas oo markii uu Isagu banaanka iskeenay iyaguna bilaabay iney kuur kuuursadaan dibadana u soo baxaan iyagoo weliba ku luga fidsanaya xaafadaha Muqdisho qaarkood. MD Farmaajo, iyo madaxda kale ee ku hareereysan oo iyaguna in badan baaqyada iyo hadalada mucaaradka dhegaha ka fureysanayey, una arkayey siyaasiyiintan kuwa doonaya iney ka habsaamiyaan hayaanka Siyaasadeed iyo hirarka qurxoon ee iyaga un u muuqda ee ay higsanayaana waxaa ku baryey waa cusub oo siyaasadeed, kadib markii ay kubaddu kaga timid dhinac aaney ka fileyn in laga soo weerari doono, mar qudha ayeyna isbedeshay gebi ahaanba siyaasaddii ay ku socdeen iyo qorshayaashii u degsanaaba,waxaana abuurmay kala shaki iyo isku dhex yaac kooban, inkastoo markii dambe arinta aad loo xakameeyay. Waxaa sidoo kale isbadal ku yimid barihii bulshada oo mar kaliya isku rogay goob ay masalaha dhigteen taageerayaashii mucaaradka oo isugu jira kuwa damaaashaadaya iyo kuwa qabyaalad hurinaya, waxaana madasha laga waayey 48-dii saac ee ugu horeysay kooxihii muxaafidka ahaa,sida Xildhibaanadii,Wasiiradii iyo shaqsiyaadkii caanka ku ahaa ee looga bartay ka hadlida Siyaasadda Dowlada, marka laga reebo kooxo yar oo muxaafid ah oo qoraaladoodii u bedelay dhanka wacdiga, nabadda iyo in Qabyaaladda laga fogaado. Lama oga muxaafidku markii leysla dhaafay intii ay garanayeen oo ay xaaladdu gaartay habara wacasho iyo ciid buurasho iney isaga gaabsadeen ka hadalka siyaasadda iyo taageeradii Dowlada iyo iney bisha barakeysan ee Ramadaan darteed ay barahooda dadka ugu wacdinayaan kheyrka iyo Nabadda. balse waxaan shaki ku jirin in gadoodkii Taliye Saadaq looga faa’ideystay hab qabiil oo ay durbadiiba rag dan gaar ah lihi ku yaaceen aqalka uu degay, iyadoo loo muujinayo isgarab taag uu wehliyo bowdya qaawis iyo boola xuufto ujeedkeedu yahay in lagu damqiyo nabarada qabyaaladdii go’a lagu dedayey ee lagu soo dhisay dowladda ama Soomaalidu wax ku soo qeybsatay, dabadeedna inta la wiiqo awoodda Dowladnimada halkaas laga dhex raadiyo mansab iyo Siyaasad layiraahdo ANNA WAA I KAN IYO TOL BEELAYEEY, 2021-ka ah,. Waase suurtagal in Saadaq Joon qudhiisu uu u fekerayey hab ka duwan habkaa haatan loo soo garab istaagay, oo ay isaga iyo saaxiibadiisba u qorsheysneyd iney howshoodu u dhacdo sida ay Ciidamadu u afgembiyaan dowladaha rayiidka ah marka loo taag waayo madaxdooda ama ay Askartuba damaaciyaan talada dalka, balse ay wax walba isbadeleen ka dib markii ay Saraakiil kale oo ay Heshiis ku wada ahaayeen in marka uu isagu bilaabo ay iyaguna isi soo muujin doonaan la sheegay iney subaxnimadii uga siibteen, taasoo la oran karo waa mida Saadaq ku xambaartay isna si uu u xeeladeysto inuu miciin bido xaafadda Shiirkole. Sikastaba ha ahaatee, MD Farmaajo iyo saaxiibadiisa siyaasadda waxaa laleeyahay hadii ay horey waxbadan isku adkeyn jireen hada waa ay ku qasban yihiin iney wax ka bedelaan jihadii ay markii hore u socdeen oo ay u soo leexdaan jihada saxda ah ee dabeysha Siyaasaddu u socoto, waana iney la yimaadaan biseyl iyo qaangaarnimo ka duwan tii hore si dalka doorasho loogu hogaamiyo, taas oo ah wadada keliya ee waqtigan furan laguna bedbaadin karo dowladnimada iyo wadajirka umadda, Soomaaliduna waxey tiraahdaa “ILEYN FARI TOG DHEER BEY KULA XUSHAA. .!!! WQ/- Abdulkadir Dulyar Tani waa aragtideyda gaarka ah.!!! Maxaa yaab isdabayaal.!!!

zhCy-CxbgCPcBGAsYHg/s320/IMG_2120.JPG"/>