WARBIXIN:- XERADA XALANE IYO WASAQEYNTA BADDEENA.!!

*XERADA XALANE IYO WASAQEYNTA BADDA.!!

* Qiyaas ahaan:- 

-20 kun oo Ciidamada AMISOM ah,
-10 Kun oo Shaqaalaha ka shaqeeya Xerada Xalane.
-3-Kun oo shaqaalaha & ilaalada Safaaradaha ah.
-Hotello, 2 Hospital oo ku yaala gudaha Xalane.

Waxaa ley sheegay dhamaan Hoteelada, Shaqaalaha iyo Ciidamada AMISOM ee xerada Xalane inay Qashinkooda iyo saxarada Musqulahoodaba ay si toos ah ugu shubaan dhanka bada Xalane.
-Sidoo kale Cusbitaalada ku dhex yaala xerada Xalane inay gebi ahaanba qashinkooda sida Faashadaha,Cirbadaha,Faleebooyinka,Dhalooyinka,Daawada la isticmaalo iyo agabka bukaanada oo dhan inay si toos ah ugu shubaan dhanka Bada Xalane, iyaga oo awoodi kara iney godod u qodaan dabadeedna gubaan.
- Dhanka kale wasaqeynta bada ee dhanka xerada Xalane waa mida sababta u ah in Xeebta Liido ay habeen walba soo tufto Meydadadka kaluun farabadan iyo xayawaanaad kale,Qashin u badan Maryo,Caagaga faleebooyinka,Cirbado,Gasacado,Walxo baco ku jira oo isku guntan oo dufan badan, iyp qashin kaloo farabadan, kuwaas oo gebi ahaaba ka dhigay xeebtii Liido goob qashin qub ah oo halisteeda leh, lagana yaabo in qashinka iyo wasaqda xerada Xalane sida joogtada ah uga yimaada ay meelo kalena ku soo caariyaan.

-Hadaba Aniga oo xasuusta Xiligii Allaha unaxariistee Ex Gudoomiye Eng Yariisow in Maamulka G/Banaadir ay dhowr jeer madaxda AMISOM kala hadleen una qoreen warqado digniino ah oo arintaan ku saabsan, ayaan la xiriiray mid ka mid ah masuuliyiinta Maamulka G/Banaadir ee iminka jira wuxuuna ii sheegay in ay xerada Xalane dhibaato weyn oo wasaqeynta bada iyo deegaanka ah ku qabaan, Islamarkaana ay dhowr mar u direen warqado ku saabsan arinkaas balse ay dhegaha ka fureysteen madaxda Amisom jawaab tooduna ay noqotay “Annagu wax kale ma awoodno oo aan aheyn inaan qashinkeena iyo wasaqdeenaba ku shubno bada”

Halkaas markeey taagan tahay waxaan ku iri,aan talo idin siiyee fadlan warqadaha aad u dirteen Amisom, Sawirada qashinkooda iyo jawaabta ay AMISOM idinka siisayba arinkaan intaad Report dheer ka diyaarisaan u gudbiya Wasaaradda Arimaha gudaha, wasaaradaha bada iyo dekedaha iyo tan dalxiiska, iyo cid kasta oo ay quseyso, Sidoo kale Madaxweynaha iyo Reysal-wasaarahana la socodsiiya, oo haka daalininee ugu yaraan Amisom u muujiya in damiirkiinu shaqeynayo oo aad ka xun tihiin xanuun weyna ay idinku hayso wasaqeynta badeena iyo xeebahaana. Wuuna iga aqbalay.

.

Maxaa yaab isdabayaal.!!

WARBIXIN:- XERADA XALANE IYO WASAQEYNTA BADDEENA.!!

Abdulkadir dulyar Saturday, December 14, 2019

QORMO:- -SIXITAAN FAHAMKA EREYGA MOOSHIN.!!!

Tusaalaha ugu macquulsan ee loo soo qaadan karo erayga MOOSHIN oo ay dad badani aragtiyo kala duwan ka qabaan waa:-

-TUSAALE:- Salaadaha waajibka ah marka la dukanayo dadku awalan waxa ay iska dhex doortaan IMAAM salaada ku hogaamiya,kaas oo layaqaano howsha laga rajeynayo inuu qabto, hadiise Imaamku wax qaldo lagama aamuso ee waxaa la yiraahdaa SUBXANALLAH oo ah baaq Imaamka loogu baaqayo inuu qalad galay,(MOOSHIN)hadii uu sixi waayo waa loogu celiyaa,(MOOSHIN KALE) hadii uu Iimaamku ku adkeysto qaladkiisa waxay jameecadu ku qasban tahay iney salaadooda maareeyaan oo ka baxaan safka sow maaha .!!

Marka bal kaba sooqaad Dowladu iney tahay jameecada ,awalan waa isku yimaadeen waxay iska dhex doorteen Madaxweyne ka dib sufuuf isku xigxigta oo Baarlamaankii, Maxkamadihii iyo xukuumadii ah ayaa daba istaaga Madaxweynaha, shaqada loo ikmadayna waa la yaqaanaa oo waa inuu dhowro Salaada iyo arkaanteeda oo kaliya oo ka dhigan Dastuurka iyo sharciyada dalka, hadii uu wax kale la yimaado oo shuruucda ka baxsan lagama yeelayo ee waa la qalad saxayaa,(MOOSHIN) hadii uu diido Madaxweynuhu in la saxo ama loo tilmaamo qaladkiisa waxaa qasab ah iney kala furfuraneyso Dowladu oo qolo waliba ey gaarkeeda u shaqeyneyso maadama uu isagu yahay Tiirka isku haya Jameecada Salaada oo ka dhigan Dowladnimada. (WAA IN MACNAHA MOOSHIN AAN SIDAA U FAHNAA.)

Sidaa daraadeed Madaxweynaha dalku marwalba waa inuu ogolaadaa in shaqadiisa la dhaliilo ama loo tilmaamo qaladaad kiisa islamarkaana waa In uu aqbalaa inuu hortago oo ka qanciyo cidda isaga u dhiibatay shaqada uu hayo,Madalna isaga reebo eedaha, madmadowga iyo tabashada ay qabaan Magacaabayaashiisu.

Hadiise uu dhegaha ka fareysto Madaxweynuhu ama uu ku fikiro inuu ku jabiyo eedaha mucaaradka aqlabiyada baarlamaan ee uu maanta heysto, waxaan shaki ku jirin in doodaha iyo eedaha maanta taagan ee loo heysto ay ahaan doonaan kuwa aan ka daba harin oo cuuryaamiya horusocdka Dowladiisa lagana yaabo iney bilaha & Sanadka soo socda sii xoogeystaan maadaama Madaxweynaha iyo Xukuumadaba ay horyaalaan sanadka dhalan doona ee 2019-ka shaqooyin dhowr ah oo isdultuban oo la qaban karay sanadkan sii dhamaanaya ee 2018 ka balse khilaaf iyo isqabqabsi lugaha lagula jiray awgeed looga baaqsaday, kuwaas oo u badan fulinta hishiisyo Siyaasadeed,Kuwa Dhaqaale,Dib u Dhiska Wadooyinka iyo Goobo kaloo muhiim ah,Amniga iyo wax ka qabashadiisa,Maalgashiga dalka, iyo loolanka adag ee Dalalka dariska ah oo ah dhamaantood kuwa u baahan in wadajir loo wajaho, ah Maadaama fulintooda iyo dhaqaajin toodana la rabo in sanadka 2019-ka ee na soo haya in toos loo gudagalo hadii Allah idmo.

Si hadaba aan dalka dib u dhac iyo murano kale oo siyaasadeed loo galin shacabkana waqtiga looga lumin waa in Madaxda sare ee Dowladeenu ay la yimaadaan qorsho iyo hab dhaqan ka duwan kuwa ay sanadkan ku shaqeynayeen, ayna noqdaan nabadoono isku wada mucaarad & Muxaafidba, sidoo kalena u howlgala isku soo celinta Siyaasada guud ee dalka si uu u abuurmo isfaham iyo wadashaqeyn.
-Mucaarad kana waxaan oran lahaa fursad siiya dowlada iyo madaxda maanta oo noqda kuwa u tura Shacabka dhibaateysan, idinka oo xaq u lehna si adag oo Soomaalinimo ahna ula xisaabtama cid kasta oo wax u dhimeysa Dalka,Dadka,iyo Diinta taas oo ah waajib guud balse idinka gaar idiin saaran maadaama intiina Xildhibaanada ah aad u dhaarateen, balse tan ah facaa iska dhicida fadlan dhamaan Mucaaradkow kala saara danaha gaarka ah iyo danta guud ee Qaranka oo sugta waqtiga ku haboon inaad tartan Siyaasadeedka socda aad dhiniciina ka gashaan.

Mahadsanidiin/=

WQ/-Abdulkadir Dulyar 

Muqdisho.

QORMO:- -SIXITAAN FAHAMKA EREYGA MOOSHIN.!!!

Abdulkadir dulyar Tuesday, March 12, 2019

QORMO:- AWR KALA GUURTA MA XUMEE UUR KALA GUURAA XUN.!!

=FADLAN ADIGOO DEGAN DHUUX QORMADAN:-

oomaalidu inkastoo  ay kala Uur guurtay hadana waxaan mararka qaar isweydiiyaa Aaway dadkii Soomaaliyeed ee Damiirka, Cilmiga,iyo Garashada lahaa?  maxaa dadka wada seexshay? Toloow dadkaasi ma dhamaadeen? Ma laga xoog iyo xoolo badiyay? Mala cabsi galiyay? Ma doorsoomeen? mise dadkii baa wada xumaaday?

-Waxaan kaloo isweydiiyaa Dadka hadda nool maxaa helay?Xagee laga heystaa? Miyeysan dareen iyo damiir laheyn? Maxay u tarmayaan, u tabcayaan, uguna daalayaan Caqligooda, Cilmigooda,Xoolahooda,Cibaadadooda,iyo noloshooda,? Maxeyse u tarayaan waxaas oo dhami , hadii aaney -Aqoontu dareensiin karin waxa noloshooda ka maqan, -Xoolahooda u heli karin nabadgalyo, -Cibaada dooduna aaney ka reebi karin  Qabyaalada & xumaanta,-Caqligoodana uu garan la’yahay iney ku raadiyaan Dal ka duwan dalka ay iminka ku nool yihiin, Noloshuse maxay macno ah oo ay u sameyneysaa hadii aaney u heli karin waxa ay uga baahan tahay.,

-Sua’aalahaas oo dhan waxaa igu qasbay inaan is weydiiyo. Sidee Soomaalidu  10 sano iyo ka badan intey ka soo dagaalantay Dulmi & Cadaalad daro ay qaarkood ka tirsadeen qaarka kale, kuna dumiyeen dowladnimadoodii,ay hadana u aqbashay iney 30 sano ku noolaato Dowlad la’aan, Burbur, cadaalad daro, Dil,Qarax,Boob,Nidaam xumo,Kala tag,sadbursi,Nabadgalyo daro,iyo is aamin daro?

-Sidee u aqbashay  in uu 30 sano mustaqbalkoodu ku jiro gacmo shisheeye, & madax isdooratay oo loo yeeriyo waxa ay dalka ka qabanayaan, kaaga darane ay 4-tii Sanaba marna ugu kala sacbinayaan, una daawanayaan  Siyaasiyiin ku hogaaminaya wado iyaga sii kala fogeyneysa,Wado mugdi ah oo sii dileysa rajadooda. Wado iyaga xuduudo loogu kala jeexayo, Oo aysan marna ku  gaareyn waxa ay rabaan balse ay isdiidsiinayaan.

• Horta wey iska socdaane xaalkoodu waa Allaa watoo wehel uma baahneyn inta Cuudu bileystaan maxeey dadkeenu  u fahmi la’yihiin  iney hal mar dib u soo eegaan wadadii  ay soomareen iyo waxa ay soo sameeyeen ama ay ku soo dhiseen iney yihiin wax saxan iyo iney yihiin wax qaldan si ay markaa u go’aan sadaan iney socodkooda  sii wataan iyo iney yiraahdaan Aleylehe wadadaani nama geyneyso meesha aan rabno ee aan wado kale raadsano. 

-Sidee dadkeenu u aqbalay muddo ka badan 10- Sano in 7-aadkiiba inta mar loo yimaado in la xasuuqo hadana ay sugaan 7-aadka dambe in goob kale lagu xasuuqo? oo ay  marna isku weydiin  la’Yihiin waxaani sababta ay u dhacaan, sida ay uga hortagi karaan iyo ma jiraa waqti cayiman oo uu ku egyahay xasuuqoodu? Maxayse qabtaan 500 ee Corneyl, 100-ka Jeneral, 20-ka S/Gaas & 1-ka S/Guud ee Dowladu u xil saartay Amaanka marka ay wiilal yaryar oo aan 1-Jeneraal la soconi ay maalin kasta dadkeena xasuuqayaan? 

-Maxaan horta isku weydiin la’nahay waa maxay waxa aan wadajirkeena ku weynay oo aan kala tageena ku heleyno? Maxaan uga wada hadli la’nahay waxa naga qaldan ,sababta keentay qaladka,waqtiga uu soo bilowday qaladku iyo waa maxay waxa ugu horeeya ee aan maanta ubaahan nahay? Si bal markaas aan u ogaano mushkiladeena,lkn iminka waxaad moodaa in mushkiladeenii laftirkeeda sidii loo walaaqayay uu xalkeedii noqday mushkilad kale oo lama taabtaan ah..

Waa gar inaad hadaladeyda la yaabtaan, waayoo weli maskaxdeena iskama aynaan weydiin  su’aalo run ah oo ay aheyd inaan mar hore isweydiino,yaabkuna sida aan filayo waa idinku gabaabsi, balse marka  uu dal ku dhaco burbur iyo Qaran jab tilaabooyinka ugu horeeya ee loo maro dib u dhiskiisa waxaa lagu sheegaa labo qodob oo kala ah “Peace Building & State Building “ Soomaaliya  labadaas wado tii saxda aheyd ayaa bilowgii horeba laga weeciyay waxaana 30 sano lagu jehawareeriyay State Building, marna Soomaalidu isma weydiin Sidee dal aan dadkiisu nabadgalyo heysan  oo aan ka heshiin wixii dhexmaray oo wada hubeysan maamul  loogu dhisi karaa?  Taasi waa tan sababtay in dalkeena lagu tijaabiyo nidaamyo uusan xamili karin oo sii kala dhantaalay awoodeenii iyo Qaran keeniiba, balse Ka warama hadii 1991-dii Peace Building laga bilaabi lahaa howsheena? Hubkana aan iska wada dhigi laheyn ama aan u dhiiban laheyn hadba nidaamka aan markaas ku heshiino.? Sidee iminka xaalkeenu ahaan lahaa?

Ugudambeyn, inta laleeyahay Soomaaliya 4-tii sanaba mar dowlad haloo dhiso  haba iska tabar yaraatee oo marba casharo laynoo yeeriyay sida loox Quraankii ka soo baxa nala leeyahay,runtana aan laga sheegeyn sida aan dowlad rasmiya ku heli karno ,  oo Soomaalidu wey kala uur guurtaye aynaan kaba wada hadleyn sida uur kala guuray loo kala daweyn karo, Waxaan ku jiri doonaa dowlado Yacyacood  ah oo aan keeni karin baahiyaheena  inaan dhibkeeda dhaxlno mooyee  balse tii Allah SWTC iyaduna waa gaarkeeda ee ROBOOW DOWLAD AWOOD LEH OO KHEYR LEH OO NA MIDEYSA NASII AAMIIN DHAHA DADWEYNOW, AAMIIN DHAHA, AAMIIN DHAHA.!!

WAXAAD MAANTA BI’ISAAN BIRI HA U SHALAAYINA.!!!

WQ/- Abdulkadir Dulyar

Muqdisho

QORMO:- AWR KALA GUURTA MA XUMEE UUR KALA GUURAA XUN.!!

Abdulkadir dulyar

WARBIXIN:-•RUN IYO DHALANTEED KALA DOORTA.!!!

 Soomaaliyeey horta dhamaanteen Riwaayad baan ku jirnaaye,runta ma isku sheegnaa? MAYA MAYA.

-Dowladu riwaayad bey jileysaa,
-Mucaaradku riwaayad bey Jilayaan,
-Shacabku riwaayad bey Jilayaan,
-Ciidamadeenu riwaayad bey jilayaan,
-Warbaahintu riwaayad bey jilayaan.
-Wadaadadu riwaayad bey jilayaan,
-Odayaashu dhaqanku riwaayad bey jilayaan.
-Madax Goboleedyadu riwaayad bey jilayaan,
-Facebooka qudhiisa riwaayad baa lagu jilayaa,
-Qurbaha kuwa joogana riwaayad bey jilayaan.

TAA WAXAA U DALIIL AH:-

Soomaaliya sanadkii 2000 ayaa loo bilaabay in dowlad loo dhiso wax la soo kacaa kufaba dowladii Sh Shariif ayaa Alshabaab muqdisho iyo gobolo badana ka saartay waloow aan howshaas si fcn loo wada qaban, hadana Caasimadu waxa ay ku soo wada noqotay gacanta dowlada.

Tan iyo maalintaas waxaa 3-6 dii biloodba mar la maqlayay in boqolaal ciidamo ah oo loogu talagalay XASILINTA CAASIMADA tababar loo soo xiray waa ku dhawaad 12 sano, hadana waxa ay dowlad walba oo timaada ku guuleysan la’dahay marka labo loo qeybiyo 17-ka degmo ee Caasimada qeyb ka mid ah.
Waa wax aan maskaxda feyoow ee bini’aadamku eysan rumeysan karin, in dowladihii Soomaaliya loo dhisay ee Billions Dollars-ka lagu qasiray ee laga sugayay iney wax iska dhaxlaan oo la yimaadaan qorshe ay dalka oo dhan Nabad xasilooni siyaasadeed iyo nidaam dowladeed uga hirgaliyaan ayaa caasimadii oo kaliya qeyb ka mid ah xasilin waayay , sabatuna waa waxaan jirin wax wanaagsan oo ay iska dhaxlaan dowladaheenu waayoo mid waliba marka ay meesha ka tageyso ayay baa’isaa dhamaan raadadkeedii wanaagsanaa waxeyna ku fikirtaa iney feylo goyso oo ka daba shaqeyso si ta ka dambeysaa ay u dhibaatooto markaas ayay howl waliba noqotaa hada iyo kow.

Sax maaha taasi wax la aqbali karana maaha, dal dadkii lahaa isku xumeynayaana ma kacaa la yiraahdaaye, intaan riwaayada iyo beenta iska deyno Soomaaliyeey runta aan isku sheegno. Oo inta aan kala qoqoban nahay oo qoloba meel wax ku qooshaneyso ha suginina in kooxi guul gaar u ah gaarto.!! Midna ogaada waxyaabaha yar yar ee noo hagaagsan ee aad aragtaan shacabkaa hagaajiyee dowladi ma hagaajin.

-Horta Dowlad macna leh ma rabnaa ,mise ma rabno?
-Midnimaa inna wada deeqdee,iyada ma raadinaa?
-Dalka ma difaacanaa ,mise waan iibsanaa?
-Sharaf iyo karaamo ma u wada noolaanaa mise gun-nimadaan baan ku jirnaa.?
-Nabad baa na wada deeqdee ma rabnaa,mise colaad baa weli inoo dhiman?
-Gacmaha ma is wada qabsanaa,mise waan kala tagnaa?
-Dhibka ma rabaa inaan ka baxno,mise waxaan rabnaa inaan ku jirno.?
-Ciidankeena Anagu ma dhisanaa,mise waan kala dirnaa?
-Dhaqaalaheena ma ku tashanaa, oo ma iska deynaa lacagaha Ajnabiga iyo kaalmada shisheeye?
-Kan dib inoo dhigaya ma iska diidnaa,mise waan daawanaa?
-Dulaaliinta nagu dhexjir ma iska qabanaa,mise waan kala difaacanaa,?
-Waxaan isku diidan nahay ma iska deynaa,oo waxaan ku mideeysan nahay ma doonnaa?
-Mustaqbalbalka ubadkeena ma ka fikirnaa, mise dhalmadaba waan joojinaa?
-Inagoo aan baqeyn oo cabsiyi nagu jirin,wadajir ma u sheegan karnaa waxa aan rabno.?

Wlhy inta aan riwaayada ku jirno ogaada dowlad walba oo naloo dhiso dadkeedaa isbadeli doonee iyadu wax isbedel ah ma keeni doonto iney ka darto mooyee, aan hal tusaale idin siiyo.!!

-U fiirso dowladdii AUN Abdullahi Yusuf waxaa barControl u taalay Ex Control Afgooye , tii Sh Shariif waxaa Control weyn u yaalay isgoyska NO4, Tii Xasan Sheekh waxey u soo rartay isgoyska Shaqaalaha,Tan Farmaajana waxey u soo wareejisay Isgoyska Sayidka,Tan ku xigtaahina waxay ku aruuri doontaa Madaxtooyada ilinkeeda, marka MA HORAA LOO SOCDAA MISE GADAAL BAA LOO NOQONAYAA.?

•Tankale, Sidaan siyo kalaa dhaama ee Soomaaliyeey aan ka wada fekarno, oo aan ka bilowno inaan  Allah SWTC xagiisa u wada noqono una towbad keeno,  maankana aan   ku hayno in hadii eynaan dowladii timaadaba lala shaqeyn oo la horkicin si daacad ahna aan loo garab istaagin, oo hadii xumaan iyo waxqabad daro laga dareemana aan laga aamusine lagu shimbira waaqleyn oo laga diidin , wax inoo hagaagayaa ma jiraane,yeynaan isku daaline waa halkaan ku dambeyno..!!

-FG:- Hadhowna markaan hoogno oo ba’no oo dalkeenu faraha ka baxo dushana leynaka Rarto, yaan la arag mid inaga mid ah oo dhibka jira u eersanaya cadow Ajnabi ah ama faragalin shisheeye ee Soomaalidu iyadu ha is eersato waayoo hadaan qaarkeen ku daabneyn Ajnabi dooni iyo calaal sita wax nagama qaadeen sow maaha.

WAXAAD MAANTA BI’ISAAN,BIRI HA U SHALAAYINA.!!

•Raalina iga ahaada hadaan idinkala hadlay wax aad wada ogtihiin oo dantiina ah,balse aydnaan rabin in la idiin sheego ama aad ku dhaqaaqdaan Maryooleey”

WQ/=Abdulkadir Dulyar
Muqdisho

WARBIXIN:-•RUN IYO DHALANTEED KALA DOORTA.!!!

Abdulkadir dulyar Tuesday, March 5, 2019